Американскиот претседател, Доналд Трамп, и шефот на иранската дипломатија, Абас Арагчи, изјавија дека Ормутскиот теснец е повторно отворен, иако Трамп додаде дека американската блокада на иранските пристаништа останува на сила.
„Во согласност со прекинот на огнот во Либан, преминот за сите комерцијални бродови низ Ормутскиот теснец е прогласен за целосно отворен за преостанатиот период на прекин на огнот“, објави Арагчи на Икс.
Кратко потоа, Трамп потврди дека Иран изјавил дека мореузот е „целосно отворен и подготвен за целосен премин“, во објава на Truth Social.
Во последователна објава, Трамп рече дека американската поморска блокада на иранските пристаништа, спроведена како одговор на блокирањето на Ормутскиот теснец од страна на Иран, ќе „остане во полна сила и ефект во однос на Иран, само додека нашата трансакција со Иран не биде 100 отсто завршена“.
Тој додаде дека очекува до решение да се дојде „многу брзо, бидејќи повеќето точки се веќе договорени“.
Комерцијалниот превоз низ Ормутскиот теснец, тесен воден пат помеѓу Иран и Оман, што е од витално значење за глобалната трговија со нафта, практично запре откако Иран се закани дека ќе нападне бродови како одговор на војната меѓу САД и Израел што започна на 28 февруари.
