Трамп во објава на социјалната мрежа Truth Social испрати јасна порака до Путин, обави Си-Ен-Ен.
„Воопшто не сум среќен поради руските напади врз Киев. Непотребно и во сосема погрешно време. Владимир, ПРЕСТАНИ! 5.000 војници умираат неделно! Ајде да го завршиме овој мировен договор“, напиша Трамп на социјалната мрежа.
Потсетиме дека во текот на ноќта и утрото руските сили го извршија еден од најразорните воздушни напади врз Украина во последните неколку месеци, а сега цел е и главниот град Киев, кој уништи многу згради и уби најмалку девет лица.
Бранови беспилотни летала, балистички и наведувани ракети го погодија главниот град на Украина во раните утрински часови. Експлозии се слушаа во текот на ноќта, почнувајќи околу 1 часот по полноќ по локално време, придружени со звуци на противвоздушна одбрана додека украинските сили се обидуваа да ги соборат проектилите.
Градоначалникот на Киев, Виталиј Кличко, изјави дека спасувачите извлекуваат преживеани од под урнатините. Меѓу повредените има шест деца и една трудница. Запалени се куќи, автомобили и други објекти, а делови од неколку градски квартови се сериозно оштетени од паѓање на остатоци од проектили.
Да потсетиме, Трамп вчера изјави дека мисли дека има договор и со рускиот претседател Владимир Путин и со украинскиот претседател Володимир Зеленски за ставање крај на војната во Украина.
Говорејќи во Белата куќа, Трамп претходно изјави дека соработката со украинскиот лидер му е потешка отколку што очекувал, иако верува дека е постигнат напредок на двете страни.
„Мислам дека Русија е подготвена и многумина рекоа дека Русија сака да оди до крај. Мислам дека имаме договор со Русија. Треба да постигнеме договор со Зеленски“, им рече Трамп на новинарите во Овалната соба, додавајќи дека смета дека ќе биде полесно да се работи со Зеленски.
„Досега беше потешко... Но, мислам дека имаме договор со двајцата. Станува збор за многу човечки животи“, рече Трамп.
На прашањето за американскиот предлог кој би вклучувал признавање на Крим како „де јуре“ руска територија, Трамп не даде конкретен одговор, наведувајќи дека „нема фаворити“ меѓу Украина и Русија и дека неговата цел е да се стави крај на војната.
Неколку часа претходно, портпаролката на Белата куќа, Каролин Левит, изјави дека Трамп е „фрустриран“ од бавниот напредок на преговорите и дека Зеленски „се чини дека оди во погрешна насока“. Американскиот претседател рече дека може да се сретне со Путин наскоро по патувањето во Саудиска Арабија, Катар и Обединетите Арапски Емирати. На прашањето дали може да се сретне со Путин во Саудиска Арабија, Трамп рече дека тоа е можно, но малку веројатно и дека најверојатно ќе се сретне со неговиот руски колега набргу по тоа патување.
