Судот оцени дека мерката веројатно претставува казна за јавна критика, а не заштита на националната безбедност.
Судијката Рита Лин ја уважи жалбата на компанијата, која е развивач на чатботот „Клод“ (Claude), и постапките на владата ги оцени како „незаконска одмаздничка мерка“ со која се нарушува слободата на говорот. Одлуката ќе стапи во сила по седум дена, со цел да им се овозможи на властите да поднесат жалба.
Од „Антропик“ ја поздравија судската одлука и соопштија дека компанијата останува посветена на конструктивна соработка со владата.
Министерот за одбрана Пит Хегсет претходно ја класифицираше компанијата како ризик за националната безбедност и за синџирите на снабдување, што доведе до нејзино исклучување од одредени воени набавки. Повод за спорот е одбивањето на компанијата да дозволи користење на нејзината технологија за потребите на надзорот и за автономно оружје.
Според изворите, технологијата била користена во контекст на воени операции во Иран, додека Министерството за правда аргументира дека ваквите ограничувања можат да ја загрозат ефикасноста на воените системи.
Дополнителни тензии предизвика и ставот на претседателот Доналд Трамп, кој ги повика федералните институции да престанат со користење на чатботот „Клод“.
„Антропик“ ја поднесе тужбата против забраната на 9 март, а во Вашингтон се разгледува и втор судски случај поврзан со можноста за проширување на ограничувањата и врз цивилните владини договори.
