Сириската армија денеска соопшти дека во најновите битки во провинциите Идлиб и Алепо биле убиени стотици бунтовници.
Според информациите од командата на сириските вооружени сили, за време на конфликтот силите уништиле десетици оклопни возила и опрема, а соборени се и 17 беспилотни летала, пренесува РИА Новости.
Во соопштението се наведува дека меѓу напаѓачите имало и бројни странски платеници.
Сириската армија ги засили своите сили и ги зајакна своите позиции на фронтот. Авионите на сириските воздухопловни сили ги нападнаа базите на бунтовничките групи во градовите Идлиб и Ат-Дана на северот од земјата, се додава во извештајот.
Нападите уследија откако милициите поврзани со групата Хајат Тахрир ал-Шам го прекршија договорот за деескалација и ги нападнаа провинциите Алепо и Идлиб во средата. Бунтовниците напаѓаа села, населени области и воени позиции, додека сириската армија возврати со напади на линиите за снабдување на терористите западно од Алепо и ги нападна позициите на милитантите во Идлиб.
Од почетокот на конфликтот во Сирија во 2011 година, многу области се ослободени од бунтовничките групи, но различни фракции се уште се активни во пустинските области на север и североисток од земјата, посочува агенцијата.
Најмалку четири лица загинаа кога бунтовничките сили во Сирија го нападнаа Алепо, вториот по големина град во земјата, откако автомобил-бомби експлодираа на западниот влез на градот, беше објавено претходно денеска.
