Кинескиот претседател Си Џинпинг го покани рускиот претседател Владимир Путин да оствари официјална посета на Народна Република Кина во првата половина од оваа година, а Путин ја прифати поканата, изјави денеска помошникот на рускиот претседател Јуриј Ушаков.
Ушаков изјави дека точниот датум и деталите за посетата ќе бидат договорени подоцна, додавајќи дека разговорот меѓу двајцата лидери преку видео повик бил значаен.
„Ваквите контакти станаа добро воспоставена традиција на комуникација меѓу шефовите на држави во последните години. Ова е веќе шести ваков разговор“, нагласи Ушаков.
Тој го опиша разговорот меѓу Путин и Шји како директен и доверлив, нагласувајќи дека им овозможил на лидерите да ги потврдат „фундаментално важните работни приоритети во наредниот период“.
Како што изјави, разговорот меѓу Путин и Шји траел речиси час и половина, а според него, Русија и Кина дејствуваат според принципот „грб до грб“ и можат да се потпрат едни на други.
Тој додаде дека кинескиот претседател ги поддржува актуелните безбедносни консултации меѓу Русија, САД и Украина, кои се одржуваат во Абу Даби, и дека интензивните лични контакти меѓу двајцата лидери ќе продолжат.
Според него, двајцата претседатели планираат да одржат билатерални средби на маргините на разни меѓународни настани оваа година, вклучително и состаноци во рамките на Шангајската организација за соработка (ШОС) и БРИКС.
Ушаков, исто така, објави дека Договорот за добрососедство, пријателство и соработка меѓу Русија и Кина е автоматски продолжен за следните пет години.
Претходно, Кремљ објави дека Путин и претседателот на Народна Република Кина имале видео повик пред прославата на Кинеската Нова Година.
