Врховниот британски полициски службеник денеска изјави дека бројот на убиства во Лондон паднал на најниско ниво за повеќе од една деценија, покажувајќи дека градот станува побезбеден и покрај тврдењата на американскиот претседател Доналд Трамп и други за бран на криминал во главниот град.
Комесарот на лондонската метрополитенска полиција, Марк Роули, изјави дека бројот на убиства во Лондон по глава на жител паднал на рекордно ниско ниво и дека градот е побезбеден од Лос Анџелес, Њујорк и многу европски престолнини. Тој додаде дека насилниот криминал во Лондон се намалува, според полициските и здравствените картони.
„И покрај тврдењата што циркулираат на интернет, вклучувајќи видеа генерирани од вештачка интелигенција од измислени сцени на насилство и некои коментари со пригоден наратив, фактите раскажуваат многу поинаква приказна“, кажа тој.
Трамп изјави во ноември дека има области во Лондон каде што полицијата немала пристап и го обвини градоначалникот на главниот град, Садик Кан, дека „дозволува да се случи криминал“.
Бројките од полицијата покажуваат дека минатата година во Лондон се случиле 97 убиства, пад од 11 отсто во однос на истиот период минатата година, а насилните инциденти што резултирале со телесни повреди се намалиле за една петтина од 2014 година.
„Доказите во Лондон се јасни, ние ја добиваме битката против насилниот криминал“, изјави Кан денеска за весникот „Гардијан“.
Бројките вклучуваат злосторства што вклучуваат сила, но перцепцијата на многу Британци за криминалот е спротивна, со оглед на порастот на злосторства како што се кражбите во продавници, кои достигнаа рекордни нивоа минатата година.
