Борците на Хајат Тахрир ал Шам (ХТС) влегле во сирискиот град Алепо, соопшти денеска оваа терористичка група. Според медиумите, 4 лица загинале кога бунтовниците активирале бомби врз автомобили додека влегувале во градот.
Сириските вооружени бунтовници тврдат дека влегле во Алепо, што е прв пат бунтовниците да влезат во вториот по големина град во земјата откако владините сили го вратија градот во 2016 година.
Бунтовниците по експлозиите се обидоа да го освојат градот, а во медиумите се појавија информации дека зазеле неколку населби во западната периферија на Алепо.
Бунтовничките сили започнаа ненадејна офанзива оваа недела, заземајќи низа села и повторно разгорувајќи конфликт кој беше главно статичен со години.
„Нашите сили почнаа да навлегуваат во градот Алепо“, се вели во соопштението на новоформираната бунтовничка коалиција, Командата за воени операции. Си-Ен-Ен не можеше независно да го потврди тврдењето и ја контактираше сириската влада за коментар.
Извори од опозицијата тврдат дека користеле беспилотни летала за напад на владини позиции, а евидентиран е и напад на воена воздухопловна база кај Алепо.
Бунтовничката „Команда за воени операции“ објави претходно дека ја презеле контролата врз воено-научниот истражувачки центар на сириската влада во предградието на градот Алепо по „интензивните судири со режимските сили и иранските милиции“.
Претходно денеска, артилериска граната погоди студентски дом на Универзитетот во Алепо, при што загинаа четири лица, според сириската државна новинска агенција САНА, која ги обвини опозициските фракции за нападот.
Портпаролот на бунтовничката група Хасан Абдулгани ги отфрли обвинувањата на сириските владини медиуми како „неосновани лаги“.
Вработен во Универзитетот во Алепо, зборувајќи анонимно од безбедносни причини, потврди дека артилериска граната го погодила вториот кат од студентскиот дом во тоа време.
Видео кое кружи на социјалните мрежи и геолокализирано од Си-Ен-Ен покажува млади мажи како трчаат од студентски дом во кампусот на Универзитетот во Алепо носејќи повредено лице.
