Министерството за правда на САД во петокот објави повеќе од три милиони страници документи поврзани со Епштајн, вклучувајќи и е-пошта од 2013 година што Епштајн си ја напишал сам на себе, објави „Бизнис инсајдер“. Се вели дека белешките се меилови што ги подготвил за некој по име Борис, вработен во Фондацијата Бил и Мелинда Гејтс, и наводно биле испратени до Гејтс по меѓусебниот спор.
Еден е-мејл, насловен како „сметка“, сугерира дека Гејтс наводно побарал лекови за сексуално пренослива болест за „тајно“ да ѝ ги даде на неговата тогашна сопруга, Мелинда Френч Гејтс. Друга порака тврди дека Борис наводно му помогнал на Гејтс да „набави лекови“ и олеснил „недозволени средби“ меѓу основачот на Мајкрософт и „руски девојки“ и „мажени жени“.
Нема докази во е-поштата што ги поткрепуваат овие тврдења.
„Документите ја покажуваат фрустрацијата на Епштајн што нема постојана врска со Гејтс“
„Овие тврдења се апсолутно апсурдни и целосно неточни. Единственото нешто што го покажуваат овие документи е фрустрацијата на Епштајн што нема постојана врска со Гејтс и до каде бил спремен да оди за да го намами и оцрни“, изјави портпаролот на Гејтс за „Бизнис инсајдер“.
Не е познато дали текстот на овие е-пораки некогаш всушност бил испратен до Бил Гејтс. Откако Епштајн изврши самоубиство во федерален затвор во 2019 година, Гејтс се соочи со прашања за степенот на нивната врска.
Мелинда се разведе од Бил поради она што таа го нарече негови средби со Епштајн
Гејтс претходно изјави дека присуствувал на неколку вечери со Епштајн од филантропски причини и дека сега жали што поминал време со него.
„Волстрит џурнал“ објави во 2021 година дека Мелинда Гејтс почнала да бара советување за развод во 2019 година, околу времето кога средбите на Бил со Епштајн станаа јавни. Во интервју за Си-Би-Ес во 2022 година, таа рече дека врските на нејзиниот поранешен сопруг со Епштајн биле фактор за нивниот развод.
