Американскиот државен секретар Марко Рубио изјави дека се надева оти прекин на огнот меѓу Русија и Украина би можел да се случи во рок од неколку дена доколку руските лидери се согласат и дека планира да состави Група од 7 дипломати кои ќе се фокусираат на завршување на војната на состанокот оваа недела во Канада.
„Вака би сакале светот да изгледа за неколку дена: ниту една страна да не пука на другата – нема ракети, ниту проектили, ниту куршуми, ништо, ниту артилерија“, им рече тој на новинарите во Ирска, на пат од Саудиска Арабија кон Канада, објави Њујорк Тајмс.
„Престанува пукањето, престануваат борбите и почнуваат разговорите.“, истакна Рубио.
Рубио рече дека верува оти нема да се соочи со непријателство од американските сојузници поради неодамнешните царини наметнати на Канада од страна на американскиот претседател Доналд Трамп и додаде дека очекува да има срдечни разговори со канадските власти, и покрај заканата на Трамп да ја анектира Канада и да ја направи 51-та држава.
„Тоа не е она за што ќе разговараме на Г7 и не е она за што ќе разговараме за време на нашето патување овде. Тие се земјата домаќин и мислам, имаме многу други работи на кои работиме заедно“, рече тој.
Рубио додаде дека тоа не е состанок за тоа како САД ќе ја преземат Канада.
Тој попладнево слета во Квебек, каде пристигнаа и други министри за надворешни работи.
Рубио вчера по разговорите во Џеда изјави дека Русија ќе ја прифати понудата за 30-дневен прекин на огнот во Украина.
„Украина направи позитивен чекор, се надеваме дека Русите ќе возвратат. Тоа би бил најдобриот гест на добра волја од руска страна“, рече Рубио.
Тој рече дека нема краен рок за почеток на прекинот на огнот, но „се надеваме што е можно поскоро“, објави Ројтерс.
Рубио додаде дека Украина и САД ќе работат на финализирање на договорот за минерали.
Украинската и американската делегација разговараа за мировниот договор за ставање крај на украинскиот конфликт и билатералните односи меѓу Украина и САД.
