Националната агенција за управување со катастрофи (БНПБ) пријави 961 смртен случај, 234 исчезнати лица и околу 5.000 повредени низ провинциите Ачех, Северна Суматра и Западна Суматра на островот заклучно со четвртокот.
Агенцијата, исто така, регистрира штета на повеќе од 156.000 домови. Вкупно 52 окрузи и градови остануваат тешко погодени.
Сухарјанто, шефот на БНПБ, синоќа му рече на претседателот Прабово Субианто дека 975.075 луѓе нашле засолниште во привремени центри низ трите региони.
Ачех е најтешко погоден, со повеќе од 900.000 раселени лица, соопшти БНПБ.
Водите од поплавите почнаа да се повлекуваат во голем број крајбрежни окрузи, иако големи области во централните висорамнини сè уште се отсечени, пренесе ДПА.
Прабово вчера ги посети областите погодени од поплавите во Ачех. Подоцна претседаваше со итен состанок на кој присуствуваа министри од кабинетот, воени команданти и провинциски функционери.
Сезоната на дождови во Индонезија, која обично го достигнува својот врв помеѓу ноември и април, честопати предизвикува големи поплави.
Еколошките групи и експертите за катастрофи со години предупредуваат дека брзото уништување на шумите, нерегулираниот развој и деградираните речни басени ги зголемија ризиците со кои се соочуваат заедниците на Суматра.
За делови од островот се прогнозираат дополнителни обилни врнежи во наредните денови, што предизвикува загриженост за семејствата кои се раселени.
