- Илјадници демонстранти се собраа синоќа во Тел Авив барајќи го враќањето на телата на преостанатите двајца киднапирани заложници што Хамас досега не ги вратил на нивните семејства, иако тоа беше предвидено во мировниот договор на кој се согласи.
По размената на киднапирани и притворени лица, меѓународните сили треба да пристигнат на терен за да го контролираат разоружувањето на Хамас, што очигледно воопшто не им одговара на некои членови на оваа организација.
Хамас сè уште бара нови изговори за да не ги врати телата, а без таа прва фаза е невозможно да се започне ново поглавје од мировниот договор.
- Хамас ни кажува дека ги бара телата на киднапираните Израелци. Тие тврдат дека се на нивна трага. Но, мислам дека нè влечат, си играат со нас и ние нема да им дозволиме да го сторат тоа, рече Ицик Гвили, татко на киднапираниот заложник, на протестот.
Израелскиот премиер Бенјамин Нетанјаху вчера разговараше со семејството на последниот израелски заложник чие тело е сè уште во Појасот Газа, објави неговиот кабинет синоќа додека демонстрантите се собираа во Тел Авив барајќи го враќањето на телата на двајцата преостанати заложници.
Ран Гвили, 24-годишен офицер од елитната единица Јасам на израелската полиција, беше убиен во акција на 7 октомври 2023 година, за време на нападот што тој ден го започна исламистичкото движење Хамас врз Израел, а со кој всушност беше предизвика војната во Појасот Газа.
Потоа неговото тело беше префрлено на палестинската територија.
Премиерот ги информираше „неговите родители за напорите на Израел да го обезбеди неговото враќање и за неговата решеност да го врати за еврејски погреб во согласност со еврејските обреди“, соопшти неговиот кабинет.
Нетанјаху, исто така, разговараше со тајландскиот амбасадор во Израел, Буњарит Вичиенпунту, за да го информира за напорите за репатријација на вториот непредаден заложник кој беше убиен и сè уште е во Газа, тајландскиот државјанин Судтисак Ринталак, се додава во соопштението.
Ринталак, 43, работеше на плантажи во кибуц во близина на Појасот Газа. Тој беше меѓу тајландските земјоделски работници убиени во нападот на 7 октомври чии тела беа пренесени со авион во Газа.
