„Поради доказите дека руските специјални служби извршиле осудувачки чин на саботажа во трговскиот центар на улицата Маривилска, решив да ја повлечам мојата согласност за работењето на Конзулатот на Руската Федерација во Краков“, рече Сикорски во објава на платформата X.
Полскиот премиер Доналд Туск вчера, по една година истрага за случајот, изјави дека руските тајни служби стојат зад огромниот пожар што речиси целосно уништи трговски центар во Варшава во мај 2024 година.
Туск напиша на платформата X дека е сигурно познато оти големиот пожар во трговскиот центар бил подметнат по наредба на руските тајни служби, дека овие дејствија биле координирани од лице кое живее во Русија и дека некои од сторителите се веќе во притвор, додека другите се идентификувани и се бараат.
Полска е цел на саботажа за која официјални лица во земјата изјавија дека е дел од „хибридна војна“ што ја водат Русите за дестабилизација на функционирањето на земјите што ја поддржуваат Украина, вклучително и палежи и кибер напади, објави Ројтерс.
