Минатата година вкупниот обем на трговија со злато изнесувал 4.974 тони, што е зголемување од 4.899 тони во 2023 година.
Во 2024 година, глобалната побарувачка за злато, поттикната од зголемените геополитички и економски несигурности, достигна ново рекордно ниво, коментира Шаокаи Фан, глобален шеф на централните банки во Светскиот совет за злато.
Трета година по ред, глобалната трговија со злато надмина 1.000 тони, а апетитот на централните банки е „ненаситен“, се вели во извештајот што го пренесе CNBC.
Народната банка на Полска минатата година беше најголемиот купувач на злато меѓу централните банки, додавајќи 90 тони на своите резерви.
Втор најголем купувач беше Централната банка на Турција (TCMB), која ги зголеми своите резерви за 75 тони, а трета е Резервната банка на Индија (RBI), институција која постојано купува злато секој месец, освен во декември минатата година.
Побарувачката за златни прачки и монети остана висока, поттикната од силниот интерес во Кина и Индија, се додава во извештајот.
„Кинеските инвеститори се соочија со недостаток на алтернативни средства во кои може да инвестираат“, се вели во извештајот, истакнувајќи дека мешавината на економска несигурност во Кина, тековната нестабилност на берзите и рекордно ниските приноси на државните обврзници ги поттикнале инвестициите во злато.
Во Индија побарувачката за злато се зголемила откако нејзината влада ги намалила увозните давачки за злато од 15 отсто на шест отсто во јули, забележа Светскиот совет за злато.
Разочарала само побарувачката за златен накит, бидејќи обемот на трговијата минатата година паднал за 11 отсто на 1.877 тони, се заклучува во извештајот.
