Германскиот канцелар Олаф Шолц викендов ќе присуствува на Генералното собрание на ОН во Њујорк, додека регионалните избори во Германија ќе одлучат за неговата политичка иднина.
Уште еден пораз од екстремната десница речиси сигурно ќе значи крај, па така Шолц, пишува <a href="https://www.politico.eu/article/germanys-olaf-scholz-joe-biden-un-politics-afd-vote/">Политико,</a> би можел да ги следи стапките на американскиот претседател Џо Бајден, кој партијата го тргна настрана и донесе кандидат кој може да избегне масакр во национални избори следната година.
СПД на Шолц е тесно зад екстремно десничарската АфД на анкетите пред изборите во недела во Бранденбург.
Доколку СПД го загуби традиционалното упориште, тоа ќе биде последното во серијата изборни неуспеси по изборите за Европскиот парламент.
На 1 септември, екстремната десница го постигна својот најголем успех од Втората светска војна, освојувајќи ја покраината Тирингија и второто место во Саксонија. СПД на Шолц е толку скршена во двата случаи.
Сè уште не е познато дали СПД ќе се одлучи за предвремени избори или ќе го постави попопуларниот министер за одбрана Борис Писториус на челната позиција пред националните избори во 2025 година.
Ако партијата загуби во Бранденбург во недела, нема да може да ја игнорира таквата загуба, а резултатот може да се гледа како поширок референдум за Шолц во време на стравови од миграцијата и економски предизвици.
Лошите перформанси на СПД во федералната влада, исто така, ги поткопуваат нејзините перспективи на регионалните избори. Покраинските лидери на партијата се во страв од настапот на политичарите од СПД на национално ниво.
- Многу би добиле доколку некои луѓе повеќе не учествуваат во ток-шоуа, изјави Катрин Ланге, осврнувајќи се на настапите на Саскиа Ескен. Таа ги нарече „неподносливи“.
Ако СПД сепак победи во недела, тоа ќе се смета за успех за регионалниот премиер Вјудке, кој водеше експлицитна кампања без канцелар. Ако победи АфД, сите ќе го обвинуваат Шолц, пишува Политико.
Неколку високи личности во партијата изјавија за Политико дека поразот во Бранденбург може да доведе до колапс на владејачката коалиција. Алтернатива може да биде министерот за одбрана Писториус, кој е најпопуларниот политичар во коалициската влада и убедливо најпопуларниот социјалдемократ.
Тој досега негираше каков било интерес да го заземе местото на Шолц, но факт е дека, иако е дел од конзервативното крило на партијата, ја има поддршката и од партиските левичари.
