Дискусијата „експлицитно се смета за дополнување на она што веќе го имаме со нашите американски партнери во НАТО“, рече Мерц на заедничката прес-конференција со францускиот претседател Емануел Макрон.
„Ќе им дадеме мандат на нашите министри да го започнат тој разговор“, рече тој. Тој посочи дека не станува збор за „замена на безбедносните гаранции што САД ѝ ги даваат на Европа“.
Во светлината на зближувањето на САД со Русија под водство на претседателот Доналд Трамп и евентуалното повлекување на САД од Европа, Мерц во февруари ги покани Париз и Лондон, двете нуклеарни сили во Европа, да разговараат дали Германија може да биде под заштита на нивното нуклеарно оружје.
Макрон истакна дека зајакнувањето на европскиот столб на НАТО нема да го ослаби Северноатлантскиот сојуз, туку дека Европејците ќе преземат поголема одговорност за себе. „Сосема е природно да се дискутираат сите теми, вклучително и нуклеарното одвраќање, со оглед на нашите истории, нашите специфичности.“
Француско-германски совет за одбрана и безбедност
Мерц и Макрон разговараа и за зајакнување на соработката во областа на одбраната во време кога двете земји ги зајакнуваат своите воени буџети. „Ќе ги забрзаме нашите француско-германски програми, ќе развиваме нови капацитети“, првенствено кога станува збор за развој на тенкови, воени авиони и ракети со долг дострел, рече Макрон.
Тие, исто така, се согласија да формираат „француско-германски совет за одбрана и безбедност“ кој „ќе се состанува редовно за да обезбеди оперативни одговори на заедничките стратешки предизвици“, рече францускиот претседател.
Двете земји, исто така, одлучија да координираат и споделуваат стратешки анализи и да започнат заедничка програма за иновации во одбраната. Тоа беше првата средба меѓу Мерц и Макрон откако Мерц вчера ја презеде функцијата.
