Специјалниот пратеник на САД, Стив Виткоф, и зетот на американскиот претседател Доналд Трамп, Џаред Кушнер, планираат да се сретнат со главниот украински преговарач Рустем Умеров во Флорида, според извештаи на Њујорк Тајмс и Си-Би-Ес Њуз, кои се повикуваат на Белата куќа.
Украинскиот претседател Володимир Зеленски претходно најави планови за нови разговори со американските претставници.
- Ги подготвуваме состаноците во САД откако американскиот тим ќе се врати од Москва и по релевантните консултации во Вашингтон, Рустем Умеров, Андриј Хнатов, заедно со остатокот од преговарачкиот тим, ќе продолжат со разговорите со пратениците на претседателот Трамп, рече Зеленски во синоќешното видео обраќање.
На својот шести состанок со Путин во вторникот, Виткоф го објасни статусот на американските размислувања за мир во војната во Украина. Советникот на Путин за надворешна политика, Јуриј Ушаков, по петчасовниот состанок изјави дека не е постигнат компромис.
Русија води војна против Украина повеќе од три и пол години.
Трамп вчера ги оцени разговорите во Кремљ како „многу добри“.
- Претседателот Путин имаше многу добар состанок вчера со Џаред Кушнер и со Стив Виткоф. Што ќе произлезе од тој состанок? Не можам да ви кажам, бидејќи за тоа се потребни двајца, им рече Трамп на новинарите во Белата куќа, додавајќи дека американските претставници имале впечаток дека Путин сака договор за ставање крај на конфликтот.
