„Господин Оџалан е подготвен во наредните денови да започне историски повик што ќе резултира со трајно решение за курдското прашање“, рече Тунчер Бакирхан, копретседател на Партијата за народна еднаквост и демократија (ДЕМ, поранешна ХДП), трета по големина партија во парламентот.
Набљудувачите веруваат дека Абдула Оџалан (75), познат и како Апо („Вујко“ на курдски), би можел да повика на прекин на вооружениот конфликт на 15 февруари, датумот на неговото апсење во 1999 година во Најроби. „Сега сè е во рацете на Ердоган... Ова е вашата шанса да напишете историја, господине Ердоган“, рече Бакирхан пред претставниците на ДЕМ во парламентот.
Претседателот Реџеп Таип Ердоган и неговите главни сојузници му пристапија на Оџалан, кој е заробен на остров во близина на Истанбул од 1999 година, кон крајот на декември, предлагајќи негово ослободување доколку ги повика борците на ПКК да го положат оружјето.
Оџалан потоа рече дека е „решен“ да го продолжи дијалогот со Анкара, велејќи дека има „историска одговорност“, според претставниците на ДЕМ, кои тогаш се сретнале со него. ПКК, партија која води вооружена борба против Анкара од 1984 година, е класифицирана како терористичка организација од Турција и нејзините западни сојузници.
