Вооруженото крило на Хамас синоќа соопшти дека дискусиите за разоружување на групата пред Израел целосно да ја спроведе првата фаза од прекинот на огнот во Газа, постигнат со посредство на САД, се обид да се продолжи со она што го нарекува геноцид врз палестинскиот народ.
Портпаролот на вооруженото крило на Хамас, Абу Убаид, во изјава за локална телевизија истакна дека покренувањето на прашањето за разоружување нема да биде прифатено.
Прашањето за откажување од оружјето на Хамас е главната пречка во преговорите за спроведување на планот „Одбор за мир“ за Газа, предложен од американскиот претседател Доналд Трамп, чија цел е да се консолидира примирјето што ги запре двегодишните борби минатиот октомври.
Хамас им соопшти на медијаторите дека нема да разговара за разоружување без гаранции дека Израел целосно ќе ја напушти Газа, изјавија три извори за Ројтерс минатата недела.
„Тоа што непријателот се обидува денеска да го промовира против палестинскиот отпор, преку нашите братски медијатори, е исклучително опасно“, рече портпаролот.
Тој рече дека барањата за разоружување „не се ништо повеќе од отворен обид за продолжување на геноцидот врз нашиот народ, нешто што нема да го прифатиме под никакви околности“.
Не беше јасно дали коментарите претставуваат формално отфрлање на планот за разоружување поддржан од САД, а политичките претставници на Хамас не одговорија веднаш на барањата за коментар.
Војната меѓу Хамас и Израел во Газа избувна откако борците предводени од Хамас започнаа прекугранични напади во јужен Израел, предизвикувајќи разорна израелска офанзива што расели голем дел од населението на Газа и ја остави енклавата во голема мера во урнатини.
Откако примирјето стапи на сила, Хамас и Израел постојано се обвинуваат меѓусебно за кршење на неговите услови.
Абу Убаида ги повика медијаторите да извршат притисок врз Израел да ги исполни своите обврски според првата фаза од планот на Трамп пред да може да се одржи каква било дискусија за втората фаза.
„Непријателот е оној што го поткопува договорот“, рече тој. Досега нема коментари од Израел за неговите изјави.
