Во градот Јашио во префектурата Саитама, недалеку од главниот град Токио, се појавила дупка и проголтала камион, јавува Би-Би-Си.
Спасувачките напори се отежнати поради урнатиот пат, а властите наредиле евакуација на десетици домаќинства во областа.
Според локалните медиуми, 74-годишниот возач последен пат им одговорил на спасувачите завчера попладне. Иако службите за итни случаи успеале да го отстранат товарниот дел од камионот од дупката со големина на базен, кабината на возачот е сè уште затрупана во нечистотија и урнатини. Дупката со дијаметар од околу 10 метри и длабока 5 метри првпат се појави завчера наутро на раскрсница на пат. Најверојатно е предизвикана од пукање на подземна канализациона цевка.
Japan sinkhole doubles in width as crews work to free truck driver pic.twitter.com/lNz7Mds61y
— Orin Ulysses Rascal (@ourascal) January 30, 2025
Властите соопштија дека отпадните води од оштетената цевка се излеале од дупката, поради што денеска се појавила втора дупка. Снимките покажаа како за време на уривањето се урна електричен столб и знак од ресторан, по што следеше дополнително уривање на патот што ги поврза двете длабнатини во огромен кратер широк 20 метри, што дополнително ја отежна спасувачката операција.
Во дупката има и гасовод, што ги зголеми стравувањата за можно истекување на гас. Властите наредија евакуација на 200 домаќинства во околината. Тие ги повикаа и жителите на градот и околните места да ја намалат потрошувачката на вода.
Огромните дупки се сè почеста појава во јапонските градови, бидејќи многу од нив имаат застарена канализациона инфраструктура. Огромна дупка проголта улица со пет ленти во градот Фукуока во 2016 година, предизвикувајќи прекини во сообраќајот и снабдување со електрична енергија и вода. За среќа немало сериозни повреди.
Минатиот август, потрагата по жена која исчезна во бездна на тротоар во центарот на Куала Лумпур беше прекината по една недела. Во тоа време, властите сметале дека е премногу ризично да продолжат да испраќаат нуркачи во подземната канализациона мрежа, која имала силни струи и остатоци.
