Иако најновото видео од израелскиот премиер Бенјамин Нетанјаху, во кое тој посетува кафуле, требаше да ги побие гласините за неговата смрт или повреда, се покажа дека е лажно и генерирано од вештачка интелигенција, јави денеска иранската новинска агенција Тасним.
Кабинетот на Нетанјаху вчера објави видео од израелскиот премиер за да ги негира шпекулациите дека е убиен или повреден во ракетните напади лансирани од Иран, но новото видео, кое требаше да ги смири сомнежите, покрена дополнителни прашања бидејќи се чини дека е генерирано со вештачка интелигенција, соопшти иранска новинска агенција.
Според агенцијата, јасен знак дека најновото видео е генерирано со вештачка интелигенција е тоа што чашата со кафе што ја држи Нетанјаху е полна до врв, но ниту една капка не се истура додека шолјата се навалува или брзо се движи, ниту пак количината на кафе се намалува откако Нетанјаху ќе се напие. Друг знак е промената во изгледот на Нетанјаху во видеото, особено кога неговото лице се гледа во профил, а споредбата на неговото лице од овој агол со вистинските фотографии од него открива дека видеото е лажно, тврди иранската агенција.
Нетанјаху вчера објави видео во кое ги исмева теориите на заговор на социјалните мрежи дека е убиен во ирански напад. Тој рече дека е жив и ги повика граѓаните да продолжат со своите секојдневни активности со претпазливост.
На видеото, кое е снимено во кафетерија, Нетанјаху нарачува кафе и вели – „Умрев … за кафе“, користејќи вообичаена хебрејска фраза за да нагласи дека некој многу сака нешто. „Го сакам мојот народ до смрт“, додаде израелскиот премиер, истакнувајќи дека е горд на начинот на кој граѓаните се однесуваат во сегашната ситуација.
