Пораката доаѓа во време кога притисокот врз украинскиот претседател Володимир Зеленски расте поради растечкиот број обвинувања за корупција што го тресат неговиот внатрешен круг, пишува Политико.
Во интервју за тој портал, европскиот комесар за правда, Мајкл Мекграт, изјави дека европските влади нема да го поддржат влезот на земја-кандидатка како Украина во блокот од 27 члена ако не докаже дека има ефикасен систем за искоренување на криминалот во самиот врв на општеството.
Истрагата тежи 100 милиони долари
Мекграт зборуваше како одговор на прашањата за заговор за проневера на околу 100 милиони долари од енергетскиот сектор на Украина. Истрагата се проширува и вклучува високи функционери блиски до Зеленски и неговата влада. Недолго по изјавите на Мекграт, антикорупциските истражители ги пребараа и просториите на еден од најмоќните советници на Зеленски, Андрије Јермак, како дел од тековната истрага. Потоа Јермак поднесе оставка.
Обвинувањата доаѓаат во исклучително чувствителен момент за Украина, бидејќи американскиот претседател Доналд Трамп врши притисок врз Зеленски да прифати мировен договор што би можел да бара од него да отстапи територија на Русија. Во исто време, напредокот на Украина кон ЕУ е забавен од унгарското противење.
Еднакви стандарди за сите
Комесарот Мекграт нагласи дека истите правила важат за секој што сака да стане дел од Унијата. „Во секоја земја-кандидат, мора да има робустен систем за справување со наводни случаи на корупција на високо ниво“, рече тој. „Мора да имате робустен систем за истраги и на крајот за гонења и пресуди, а демонстрирањето ефикасност во таа област е нешто што го бараме од сите наши земји-членки, а секако и од оние што сакаат да се приклучат кон Европската Унија“.
Тој додаде дека „владеењето на правото и судските реформи се во срцето на процесот на пристапување“ и дека ЕУ има „многу отворен и искрен однос со украинските власти“ во врска со поставените барања. Тој предупреди дека стандардите за владеење на правото мора да ги исполнат сите земји-приклучени. „Ако не ги исполнат, тогаш нема да ја добиете поддршката од земјите-членки на ЕУ за да продолжите напред по патот на пристапување“, беше јасен тој. На прашањето дали Украина прави доволно, Мекграт рече дека верува оти Киев вложува „најдобри напори“ за борба против корупцијата. „Тоа е патување и ние внимателно ги следиме случувањата и остануваме во постојан контакт со украинските власти за прашања што ни доаѓаат до внимание или што се објавуваат јавно“, заклучи тој.
