Според анкетата на јавното мислење на Институтот Insa, објавена од дневниот весник Bild, АфД би ја избрале 27 проценти од гласачите, два процентни поени повеќе од Христијанско-демократската унија CDU/CSU. На последното испитување, овие две партии беа изедначени.
На предвремените парламентарни избори во февруари, Унијата освои 28 проценти, а AfD 20 проценти.
Заштитен ѕид или не
Во меѓувреме, во рамките на партиите на Унијата CDU/CSU се разви дискусија дали треба да продолжат строго да одбиваат соработка со AfD, чии делови се покажаа како десничарски радикали.
Претседателот на Христијанско-демократската унија (CDU) и германски канцелар, Фридрих Мерц, изјави пред состанокот на претседателството на партијата во недела дека христијанските демократи ќе останат на својот став против AfD.
„Нема заеднички точки меѓу ЦДУ и АфД, туку фундаментални разлики“, рече Мерц на митинг во Мешеде во западна Германија.
Тој рече дека „нема соработка со партија која го доведува во прашање сè што ја направи Германија силна во последните децении“.
„Во секој случај, не додека сум претседател на ЦДУ“, им рече Мерц на граѓаните во неговата изборна единица.
Тој објасни дека АфД е против Европската Унија, против еврото, против НАТО и против воената служба, а дека ги доведува во прашање и политиките на христијанско-демократските канцелари како што се Конрад Аденауер или Ангела Меркел.
Силни на исток
Со тоа, Мерц подвлече јасна позиција пред состанокот на претседателството на партијата, каде што ќе се дискутира за ставот кон АфД, особено во источногерманските федерални држави каде што АфД е над просекот силна.
Некои поранешни лидери на ЦДУ, како и многу функционери на ЦДУ на истокот на земјата, јавно се запрашаа во последните денови за целесообразноста на принципот на одбивање на соработка со АфД, што се нарекува тактика на огнен ѕид.
Стравот на некои делови од христијанско-демократскиот блок е насочен кон фактот дека изборите за локалните парламенти се одржуваат следната година во неколку федерални покраини. Во источните покраини Мекленбург-Западна Померанија и Саксонија-Анхалт, AfD ја надминува границата од 40 проценти во анкетите.
Гласачите на AfD со антиимиграциска политика
Во интервју за неделното издание на дневниот весник Frankfurter Allgemeine Zeitung, Мерц рече дека на изборите следната година AfD ќе го претставува „главниот противник“.
„Ќе ги направиме разликите меѓу нас и AfD уште појасни“, рече Мерц.
Откако дојде на власт во мај, германскиот канцелар и неговата влада спроведуваат политика на строги ограничувања за таканаречената нерегуларна миграција, што резултираше со драстичен пад на барањата за политички азил.
На иницијатива на CDU/CSU, неодамна беше укината можноста за забрзано стекнување на германско државјанство, што ја воведе поранешната влада на социјалдемократите Олаф Шолц.
ЦДУ/ЦСУ веруваат дека ова ќе ги одземе аргументите од рацете на АфД, чија политика во голема мера се потпира на ширење нетолеранција кон странците и барања за укинување на имиграцијата.
