Сослушувањето е дел од истрагата за починатиот финансиер предводена од Надзорниот комитет на Претставничкиот дом, пред кој веќе сведочеле бројни истакнати личности, вклучувајќи ги Бил и Хилари Клинтон, пишува „Скај њуз“.
Гејтс не е обвинет за никакво кривично дело, а неговиот портпарол рече дека „ја поздравува можноста“ да одговори на прашања. „Иако никогаш не бил сведок ниту учествувал во никакви нелегални активности на Епштајн, тој со нетрпение ја очекува можноста да одговори на сите прашања што може да ги има комитетот и со тоа да ја поддржи нивната важна работа“, се вели во соопштението. Сослушувањето е закажано за 10 јуни.
„Жалам за секоја минута помината со него“
Се зголемуваат повиците истакнати личности именувани во таканаречените досиеја на Епштајн да се изјаснат за нивните врски со него и какво било знаење за неговите злосторства. Во исто време, самото споменување во документите не подразбира извршување на кривично дело.
Милиони документи објавени од Министерството за правда на САД во последните месеци вклучуваат е-пошта помеѓу Епштајн и Гејтс, како и негови фотографии.
Гејтс тврди дека неговата врска и повеќекратните средби со Епштајн биле ограничени на дискусии за филантропија и дека било грешка да се сретне со него. „Жалам за секоја минута што ја поминав со него“, изјави тој за австралискиот 9News претходно оваа година.
Поранешниот државен обвинител на Трамп пред комитетот
Во наредните месеци, Пам Бонди, поранешната главна државна обвинителка во администрацијата на Доналд Трамп, која беше отпуштена минатата недела, исто така треба да се појави пред комитетот. Трамп наводно бил незадоволен од нејзиното ракување со досиејата на Епштајн. Повикот за нејзино сведочење бил поттикнат од републиканката Ненси Мејс, која рекла дека „американскиот народ сака одговори“.
Позадина на истрагата
Џефри Епштајн, богат и добро поврзан финансиер, беше уапсен во 2019 година под федерални обвиненија за трговија со луѓе за сексуална експлоатација. Во август истата година, тој беше пронајден мртов во неговата затворска ќелија.
Неговите врски со некои од најмоќните луѓе во светот беа под лупа откако Трамп потпиша закон минатиот ноември со кој се бара од Конгресот да објави документи поврзани со истрагата за Епштајн.
