Првата фаза од вежбите се одржа во јужна Русија минатиот месец, во она што нуклеарните аналитичари го опишаа како предупредувачки знак на Путин за да го одврати Западот поактивно да влезе во војната во Украина.
Белорускиот министер за одбрана, генерал Виктор Хренин рече дека вежбите се проактивна мерка за „да ја зголемиме нашата подготвеност да користиме таканаречено одмазднички оружје“.
„Сега, повеќе од кога било, сме решени да одговориме на какви било закани за нашата земја и сојузот на Русија и Белорусија“, рече тој.
Тој не кажа каде се одржуваат вежбите и каков вид на оружје користат. Белорусија дели граница со три земји членки на НАТО, Полска, Литванија и Латвија.
„Немаме за цел да создаваме никакви тензии во прашањата за регионалната безбедност. Ние не проектираме значителни воени закани за трети земји или некој друг“, додаде Хренин.
„Ние сме мирна земја, не се закануваме и не бараме конфликт со никого, но барутот ќе го чуваме сув!“, заклучи тој.
Путин и белорускиот лидер Александар Лукашенко минатата година најавија дека Русија ќе префрли дел од своето тактичко нуклеарно оружје во Белорусија. Станува збор за боеви глави наменети за употреба на бојното поле, за разлика од стратешкото оружје со долг дострел кое служи за уништување цели непријателски градови.
Некои западни аналитичари сметаат дека тактичкото нуклеарно оружје станало поважно во плановите на Москва од почетокот на војната во Украина, каде нејзините сили постигнале бавен напредок во првите две години.
Употребата на такво оружје, теоретски, би го шокирала Западот, но не мора да доведе до нуклеарна војна, иако ризикот од ескалација би бил огромен. Од првиот ден на војната, Путин постојано го предупредува Западот за големината и силата на рускиот нуклеарен арсенал.
Русија не дава никакви информации за вежбите со Белорусија, Москва претходно само најави дека тие ќе се одржат.
Првата фаза се одржа минатиот месец во областа Астрахан на југот на Русија, според геолокацијата потврдена од Ројтерс, а ги вклучи и ракетите Бодеж (Кинжал) и Искандер.
Руското Министерство за надворешни работи минатиот месец рече дека се надева оти вежбите ќе ги „оладат вжештените глави во западните престолнини“ откако францускиот претседател Емануел Макрон ја навести можноста за испраќање европски трупи да се борат против Москва во Украина, а британскиот министер за надворешни работи Дејвид Камерон рече дека Киев има правото да користи оружје што му го даде Лондон за да нападне цели во Русија.
