Капитенот на Аргентина го зеде микрофонот по натпреварот и им се заблагодари на семејството, соиграчите и навивачите, истакнувајќи дека за него била огромна чест повеќе од 20 години да го носи дресот на националниот тим.
„Денес е тешко да се каже што било, има многу емоции, многу работи ми минуваат низ глава. Прво помислувам на мојот татко. Ми преостанува само да се заблагодарам, како што кажав и во прошталното писмо. За мене беше огромна чест повеќе од 20 години да го бранам овој дрес. Дури и во најтешките моменти низ кои минувавме, никогаш не престанав да се борам, да давам сè од себе и секогаш да бидам тука“, рече Меси.
Тој призна дека особено тешко ќе му падне тоа што повеќе нема да доаѓа на собирите на репрезентацијата.
„Многу ќе ме боли што повеќе нема да доаѓам. Ви се колнам, би сакал да доаѓам цел живот, бидејќи играњето за репрезентацијата на Аргентина е најубавото нешто што може да ти се случи“, истакна Меси.
Зборувајќи за одлуката да ја заврши репрезентативната кариера, Меси се осврна и на последното Светско првенство и патот на Аргентина до борбата за светската титула.
„Иако сакам засекогаш да бидам тука, чувствувам дека дојде моментот. Сè што доживеав на последното Светско првенство беше премногу. Сонувавме повторно да станеме светски шампиони, бевме многу блиску и вистината е дека не се случи ништо невообичаено“, рече капитенот на Аргентина.
Меси посебно им се заблагодари на соиграчите со кои во текот на репрезентативната кариера ги освои Светското првенство, Копа Америка и Финалисима.
„Сакам да им се заблагодарам на соиграчите за времето што го поминав со оваа група, бидејќи ми овозможија да го остварам детскиот сон – да бидам светски шампион, шампион на Америка, освојувач на Финалисима и на сè за што се боревме. За мене беше огромна чест да ги споделувам со нив моментите на теренот и надвор од него“, рече Меси.
Посебно внимание им посвети и на навивачите, на кои им се заблагодари за поддршката во текот на целата репрезентативна кариера.
„Многу ќе ми недостасува да играм овде. Имав среќа да ја поминам целата земја и секаде добивав огромна љубов. Благодарен сум за сè што доживеав“, изјави Меси.
