Најдобриот фудбалер на Реал Мадрид, најдобриот фудбалер на Франција, веројатно во моментов и во светот, повторно е во центарот на вниманието, ама не за фудбалски теми.
Килијан Мбапе предизвика контроверзии во Франција со посетата на падел клуб во Дубаи откако ја напушти репрезентацијата поради повреда. Повлекувањето на Мбапе од француската репрезентација поради воспаление на глуждот повторно ја разгоре дебатата откако ѕвездата на Реал Мадрид беше забележан во Дубаи за време на паузата за меѓународни натпревари.
Наместо да се врати во Мадрид на медицински прегледи, напаѓачот помина неколку дена во луксузен хотел и посети локален падел клуб, оживувајќи ги старите контроверзии во Франција околу неговите отсуства.
Капитенот на Франција го пропушти последниот квалификациски натпревар за Светското првенство против Азербејџан, а тензиите се зголемија откако отпатува во Дубаи кратко по напуштањето на кампот на репрезентацијата.
Се очекуваше ѕвездата на Реал да се врати во Мадрид на дополнителни прегледи пред повторно да се приклучи на клубот. Наместо тоа, тој отпатува од Париз за Дубаи во сабота наутро.
Според „Л’Екип“, Мбапе поминал неколку дена во луксузниот хотел „Атлантис Ројал“ и го посетил клубот „Падел Уан“, иако не е јасно дали играл таму или само навратил. Неговото заминување се случи само 24 часа откако Француската фудбалска федерација (ФФФ) издаде соопштение во кое се вели дека е повреден.
