Един Џеко објави дека својот последен натпревар за фудбалската репрезентација на Босна и Херцеговина ќе го одигра против Шведска на 2 октомври. Џеко ја објави оваа одлука во објава на социјалните мрежи, истакнувајќи дека понекогаш се прашувал кога ќе дојде моментот за збогување.
„Понекогаш се прашував кога ќе дојде овој момент… Но, никогаш не можев да замислам колку емотивен ќе бидам додека ги пишувам овие зборови. На 2 октомври, против Шведска, ќе го одиграм мојот следен и последен натпревар за нашата репрезентација“, рече Џеко.
Тој има играно 151 пат за репрезентацијата на Босна и Херцеговина, а во објавата нагласи дека ништо во неговата кариера не може да се спореди со гордоста што ја чувствувал носејќи го дресот на репрезентацијата.
„Тоа беше мој сон од детството, сон што го носев со себе секој од 151 пат кога имав чест да ја претставувам мојата земја на фудбалскиот терен. Секогаш бев горд што го носев како и првиот пат“, рече тој.
Џеко се потсети и на првиот натпревар против Турција, пред речиси 20 години.
„Многу работи се променија од тогаш, и јас се променив, но мојата љубов кон овој дрес никогаш не се промени. Сега чувствувам дека дојде време да се пензионирам. Ако наполнив 40 години со репрезентацијата, тоа е затоа што дадов сè што имав. Секој пат. Сè“, напиша Џеко.
Џеко рече дека играњето за Босна и Херцеговина била „најемотивната привилегија“ што му ја дал фудбалот, а го издвои и пласманот на репрезентацијата на првото Светско првенство во 2014 година.
„Квалификациите за нашето прво Светско првенство во 2014 година се уште се еден од најсреќните моменти во мојот живот како фудбалер“, рече тој.
Тој зборуваше и за емоциите по голот против Велс, како и за натпреварот против Италија во Зеница во март.
„Емоциите што ги почувствував таа вечер по голот против Велс, а потоа и во Зеница против Италија во март, ќе останат во моето срце засекогаш. Гледањето како мојот народ слави на улиците на нашите градови беше уште еден неверојатен подарок што ми го даде фудбалот“.
Џеко најави дека ќе има време да им се заблагодари на сите што беа со него за време на неговата репрезентативна кариера, а ги покани и навивачите да бидат со него на прошталниот натпревар против Шведска.
„Засега, само сакам да бидете таму таа вечер против Шведска, да споделиме уште една емоција заедно… Бидејќи секој од овие неверојатни моменти беше нешто што го живеевме заедно“, напиша тој.
Ја заврши објавата со порака:
„И токму така сакам да ја доживеам мојата последна ноќ во дресот на репрезентацијата: со сите вас покрај мене, носејќи го дресот што го сакам уште од дете – и што ќе го сакам до крајот на мојот живот“.
sportmedia.mk
