Репрезентацијата на Луксембург ја победи селекцијата на Бугарија во Пловдив со резултат од 2:1 во групата 4 во Ц Лигата на Нации. Домашната селекција претрпе прилично срамен пораз против Луксембургжаните, кои долго време се сметаат за „лилипутанци“ кога станува збор за репрезентативен фудбал. Бугарија поведе во 18-тата минута со голот на Асен Чандаров, а Леандро Бареиро го израмни резултатот во 37-мата минута. Винсент Тиел постигна гол во 65-тата минута за пресврт.
Во истата група, Естонија направи изненадување играјќи 1:1 со селекцијата на Исланд во Рејкјавик. Домашната екипа поведе во 45-тата минута со голот на Андриј Гудјонсон, синот на легендарниот Ејдур Гудјонсен, а Естонците пропуштија одлична шанса за израмнување во 52-тата минута кога Палумец промаши пенал. Тоа не ги обесхрабри госрите па Максим Паскоци постигна гол во 64-тата минута и ѝ донесе бод на Естонија.
Натпреварот во групата 3 во Торшавн заврши со ист резултат, каде што Фарските Острови и Казахстан одиграа 1:1. Стрелци беа Аки Самуелсен во 14-тата минута и Темирлан Ерланов во 26-тата минута од натпреварот.
Како што се очекуваше, најмала неизвесност имаше во Сан Марино, каде што Финска убедливо победи со 7:0. Џоел Похјанпало постигна хет-трик, Лео Валта постигна два гола, а Адриан Сванбак и Бенџамин Калман беа меѓу стрелците. Домашниот тим го заврши натпреварот со еден играч помалку, бидејќи Голинучи беше исклучен во 51-вата минута.
