Во резолуцијата, која ја усвои Советот за мир и безбедност на Африканската унија, организацијата наведува дека има „нулта толеранција за неуставни владини промени“ и предложи Гвинеја-Бисао „веднаш да се суспендира од учество во сите активности на Унијата, нејзините органи и институции, сè додека не се воспостави уставниот поредок“.
Војската ја презеде власта во Гвинеја-Бисао на 26 ноември, по претседателските и парламентарните избори на кои актуелниот претседател Умаро Сисоко Ембало и кандидатот на опозицијата Фернандо Дијаз прогласија победа.
Гвинеја-Бисао е една од најсиромашните земји во светот, а државните удари не се ретка појава во неа по стекнувањето независност од Португалија пред повеќе од 50 години. Земјата стана центар за трговија со дрога меѓу Латинска Америка и Европа, што експертите го сметаат за една од причините за политички немири.
Гвинеја-Бисао исто така на 27 ноември е суспендирана од Западноафриканскиот регионален блок.
По државниот удар, армијата го инаугурираше поранешниот началник на Генералштабот на армијата, генерал Хорта Инта, за шеф на воената влада, која треба да го надгледува едногодишниот преоден период во земјата, објави државната телевизија.
