Евтин популизам, манипулации и празни ветувања се карактеристика за политиките на СДСМ во земјоделството! Интервентниот фонд го ветувавте уште во 2016 година, а денес по предлог на амандман на опозицијата за формирање на интервентен фонд излегувате и се фалите. Брука! Георгиевски, гарантирам дека не ни знае како и кога би се користеле овие средства но тоа е таа безидејност и нестручност. Денес дотичниот требаше да им каже на сточарите кога ќе ги земат субвенциите за млеко кои ги чекаат уште од 2019, или откупот на оризот кој стои по амбарите неоткупен, да каже како може да се преживее со 2 денари откупна цена кај јаболкарите и за сите оние проблеми кои се наталожени кај земјоделците.... Луѓе како Георгиевски несмеат и незнаат да креираат добри политики, единствено се добри во криминалот кој го практукуваат ама за тоа во некое идно време!...

Со изведба на театарската претстава „Вистина или лага“, се „врати“ драмскиот аматеризам во Делчево. Претставата како што истакна директорот на делчевскиот центар за култура Методи Толевски, после подолг период е поддржана од Министерството за култура. -Сигурно има седум до осум години откако публиката имаше можност да види театарска претстава подготвена од актери аматери. Министерството за култура ни излезе во пресрет и можам да кажам дека сум пресреќен, што на мала врата го враќаме драмскиот аматеризам во Делчево, рече Толевски. Режисерот Маријана Стоименовска, додаде дека претставата била наменета за лицата со попреченост од Делчево. -Во ова време невреме, сакавме малку да им дадеме силна насмевка на овие деца, како и на сите деца, бидејќи сите училишта на подолг период беа затворени и конкретно актерите кои се ученици имаа желба да направат нешто со своите активности, кои ги нарекуваме вон-наставни активности. Во договор со Центарот за култура кој ни излезе во пресрет, ова беше можност децата да покажат колку знаат и умеат, рече Стоименовска. За учесниците во драмата, беше задоволство да се настапи пред делчевската публика. -Јас ја глумев Ула, а со оваа претстава сакавме да покажеме колку треба да ја почитуваме традицијата, треба да бидеме и модерни, но секогаш да го почитуваме тоа што било пред нас, истакна Искра Ѓеоргиевска. Драмската претстава „Вистина или лага“ според планираното ќе биде прикажана и во Берово, Пехчево, Виница, Кочани и Македонска Каменица....

Меѓународните експерти што ќе бидат побарани од Европската комисија за истрага на судски случаи, што било едно од барањата на Алтернатива за да влезе во Владата, нема да ги поништуваат донесените пресуди, туку ќе дадат свои мислења кај нашите институции, рече Зоран Заев одговарајќи на новинарски прашања. Лидерот на партијата Африм Гаши побарал Владата да испрати писмено барање до Европската комисија преку Делегацијата на ЕУ да испратат експерти коишто ќе направат мониторинг на случаите за кои, според Алтернатива, има сомнежи во судските одлуки и за политички влијанија, како што се Монструм, Алфа, Диво насеље, Алмир Алиу… Заев рече дека ова е договорено зашто довербата во правосудниот систем е, како што рече, „поодамна разнишана“. Но тоа не значи, рече, дека некој ќе може да ги поништи судските процеси или да направи нешто спротивно на нашите закони. Како во случајот со пожарот во болницата Тетово, кога дојдоа германски експерти, тие ќе треба да направат свои извештаи и да ги достават до нашите институции. -Меѓународните експерти ќе навлезат во случајот и ќе дадат свој коментар, секако доколку тоа го прифатат. Тоа се однесува на барањата на Алтернатива, но и за неколку други случаи – за новинарот Никола Младенов и други за кои се уште нема предмети. Експертите не можат да носат пресуди, не можат да судат. Доколку прифатат, а ние ќе направиме се да прифати Европската комисија и делегацијата да испратат експерти, тие ќе дадат свои анализи и коментари пред институциите на нашиот систем, додаде Заев....

Кадровските решенија што ќе ги предложи Алтернатива за министри и заменици министри ќе го чекаат новиот мандатар за да бидат избрани во Собранието. -Владата околу крајот на годината ќе биде предложена, мојата оставка ќе биде депонирана, кога ќе почне постапката за предлагање на новата Влада во Парламентот. Тоа се 20-ина дена од сега. Ова прашање од тогаш натаму не зависи од мене, туку ќе зависи од новиот мандатар, од новиот премиер, рече денеска премиерот Зоран Заев на прес-конференцијата со лидерот на Алтернатива Африм Гаши. За кадровските решенија во Алтернатива ќе решава Централното претседателство. Гаши рече дека во наредните денови ќе направат внатрепартиски консултации и кога ќе имаат решенија, рече, ќе го свикаат централното претседателство и ќе се донесат одлуките кои имиња ќе ги претставуваат во извршната власт. Посочи и дека имињата што кружат во јавноста се шпекулација зашто тие се уште не се потврдени во партиските органи. Немаат одлука за здравство иако се спомнува д-р Беким Сали, кој за Заев би било прифатливо решение. Прашан дали сега е подготвен да го смени Венко Филипче од функцијата, бидејќи не ја прифати неговата оставка по пожарот во модуларната болница во Тетово, Заев одговори дека Македонија досега немала подобар министер за здравство. -Венко ќе стане подругар со мене отколку што бил зашто ќе имаме повеќе време, рече Заев. На новинарско прашање зошто, за разлика од Беса која имаше еден министер и двајца заменици во Владата, за соработката со Алтернатива се спомнуваат повеќе членови и 47 функции и дали тоа било условот за влез во Владата, Гаши одговори дека во преговорите за влез во Владата немале уценувачки пристап и дека единствено се раководеле за доброто на државата и дека условот бил програмските определби. Заев, пак, кажа дека не знае за список на функции што е објавен, но може да потврди дека Алтернатива добива доста повеќе значајни одговорности во извршната власт. Во однос на коалицирањето со опозициските партии за локалните избори, Африм Гаши рече дека ставот им е оти остануваат докрај верни на коалициите со кои заедно настапиле – и Алијанса за Албанците и онаму каде што поддржале независен кандидат. -Нашите гласачи гласале за тие кандидати. Ние унилатерално нема да ги прекинеме овие коалиции, се додека од другата страна нема раскинување или се искаже недоверба или унилатерално ја прекинат соработката со Алтеранатива. Тогаш ќе бидеме принудени да функционираме поинаку, рече Гаши....

Заменик помошникот на државниот секретар на САД за европски и евроазиски пршања и специјален претставник за Западен Балкан, Габриел Ескобар, утре доаѓа во Македонија на средби со претседателот Стево Пендаровски и други функционери, соопшти Американската амбасада во Скопје. – Го поздравуваме пристигнувањето на специјалниот претставник за Западниот Балкан, Габриел Ескобар, во Скопје. За време на посетата, г.Ескобар ќе се сретне со претседателот Пендаровски и со други клучни функционери да разговараат за повеќе теми и заеднички приоритети за регионот, наведуваат од Амбасадата на САД во објавата на фејсбук. Се очекува на средбите во Скопје да стане збор за актуелните политички случувања во земјава и во регионот, како и за евроинтеграцијата и бугарската блокадата на Македонија. Ескобар неодамна во обраќањето пред Комитетот на Претставничкиот дом за надворешна политика на САД се заложи Македонија и Албанија да ги започнат преговорите со ЕУ пред крајот на годинава. – Најсилната порака што ЕУ сега можа да ја испрати е да започне преговори за членство во ЕУ на Македонија и Албанија пред крајот на оваа календарна година. Со тоа ќе се отфрли разочараноста на населението во регионот од европските политики и ќе се запре злонамерното влијание на Русија и Кина кои работат против проширувањето на ЕУ во Западен Балкан, рече Ескобар. Укажа и дека Скопје и Тирана ја завршиле тешката работа што од нив се барала и оти процесот треба да започне без одложување, поосчувајќи на заедничката изјава на државниот секретар Ентони Блинкен и високиот претставник за надворешна политика на ЕУ Жозеп Борел дека евроинтеграцијата е единствена надеж за регионот....

Претседателот на Португалија, Марсело Ребело де Соуза денеска потпиша декрет со кој се распушта Парламентот поради престојните предвремени избори. Декретот е потпишан последниот ден од рокот за распуштање на Парламентот, што мора да биде 55 дена пред избори Предвремените парламентарни избори во Португалија се закажани на 30 јануари 2022 година откако беше поразена малцинската социјалистичка влада при гласањето за буџетот за следната година....

Одлуката за замрзнување на цените на основните прехранбени продукти ја донесовме со цел да нема поголемо влијание во делот на трошоците што граѓаните ги имаат, особено во време на енергетска криза, имајќи предвид дека цените на електричната енергија можат да влијаат директно и индиректно во зголемување на цените и на производството и на трговијата, било тоа да е трговија на мало или на големо, изјави министерот за економија, Крешник Бектеши на денешната прес-конференција. Бектеши вели дека со донесувањето на одлуката основните прехранбени продукти, лебот, шеќерот, брашното – тип 400, сончогледово масло за јадење, трајното млеко со масленост од 2,8, 3,2 и 3,5 проценти, свежото месо и сувомесни производи, сирењето и урдата да се продаваат по цените што ги имале на 1 декември, не значи дека нема да се прошири одлуката и со другите производи. – Се зависи од податоците што ќе ги добиеме наредната недела од Заводот за статистика, овие одлуки ги носиме само во интерес на граѓаните и во интерес на нивниот животен стандард, додава Бектеши. Прашан зошто одлуката за замрзнувањето на цените не е донесена по примерот на Србија, министерот за економија посочи дека тоа зависи од многу параметри. -Првично репроматеријалите на одредени домашни компании кои произведуваат сончогледово масло за јадење во нашата држава главно ги увезуваат. Во делот на увезената цена не можеме ние да влијаеме зошто тие производи се произведуваат надвор од државата. Ние можеме да влијаеме во делот на маржата што ја утврдува домашната компанија во формирање на конечната цена, појасни Бектеши. Втор чекор, тој вели дека е трговијата на мало каде се пласираат одредени производи и како трета фаза е цената којашто граѓаните ја купуваат во маркетите, која е мала трговија во однос на маржите. – Што се однесува до одредени продукти кои се произведуваат домашно, ние паралелно имаме други механизми преку Законот за директна поддршка на инвестициите, преку субвенционирање на одредени производи што веќе ги реализираме и имплементираме и во претходните години, а секако од почетокот на наредната година дополнително ќе ја зголемиме поддршката за вакви производи, кажа министерот. Бектеши посочи дека Северна Македонија во време на пандемија на коронавирусот била прва земја во Западен Балкан која донела вакви мерки, со цел да излезе во пресрет на граѓаните, потрошувачите и трговците, но и производителите. Тој истакна дека на годишно ниво се трошат над 15 милиони евра директно од Буџетот за да се финансираат дополнителни проекти, нови технологии, креирање на нови производи на домашните компании. – Претходната година кога носевме ваква одлука немаше негативни влијанија врз економијата генерално. Можеби имаше намалување на профитите на одредени сектори, но немаше луѓе што изгубија работни места, немаше компании што го намалија производството. Немаше трговци што го намалија обемот или приходите во претходната година. Ние внимаваме на сите овие параметри кога носиме вакви одлуки. Ние ја носевме одлуката врз основа на податоците што се објавуваат транспарентно, отворено од страна на ДЗС за месец октомври, вели Бектеши. Министерот за економија порача дека во време на пандемија и енергетска криза, потребна е солидарност и намалување на маржите во производство и трговија и оти државата, согласно капацитетите ќе излезе во пресрет на сите чинители во економијата. Најави дека следната недела се очекуваат податоците за месец ноември и ако е потребно дополнително ќе се прошири листата на производи за кои ќе се носи одлука за замрзнување на цените. Владата на Република Северна Македонија на 4 декември 2021 година донесе одлука да се замрзнат цените на основните прехранбени производи до 31 јануари 2021 година. Од Владата најавија дека ако има потреба таа одлука ќе биде продолжена....

Ракетата „Сојуз“ е успешно лансирана од центарот на Француска Гвајана со два сателити на системот за навигација Галилео. Сојуз ВС26 е лансиран синоќа во 21.19 часот по локално време и покрај дождот. Првично закажано за 1 декември, лансирањето беше одложено двапати поради метеоролошки услови и еднаш поради технички проблеми. Целта на европскиот проект Галилео е да се намали зависноста од американскиот ГПС – глобален систем за позиционирање. Планирано е проектот, кој чини околу осум милијарди евра, да има вкупно 30 сателити. Со последните два, досега се лансирани 28....

Министерот за финансии Синиша Мали изјави денес дека во четврток на седницата на Владата на Србија на дневен ред ќе се најдат измените на Законот за експропријација, а предлогот за тие измени ќе биде готов денеска, јави дописниот на МИА од Белград. Тој се согласи со претседателот Александар Вучиќ, кој вчера во разговор со жителите на Јадар во околина на Лозница, каде треба да се гради рудник за литиум на Рио Тинто, истакна дека најспорните точки во овој закон се кратки рокови и порача дека тоа мора да се смени. – Законот е во согласност со Уставот, а станува збор за одредени рокови, кои според претседателот (Александар) Вучиќ, а и нашите, даваат пократок временски рок за одлучување за продажба на имот од пет дена. Денеска ќе дадеме предлог за измена на новиот закон, за до четврток да го имаме на владина седница. Рокот за потпишување е 10-ти во месецот, а во парламентот ќе влезе на усвојување до крајот на годинава, изјави Мали на ТВ Прва. Тој нагласи дека законот нема никаква врска со Рио Тинто. – ТОЈ ЗАКОН НЕМА НИКАКВА ВРСКА СО РИО ТИНТО. СЕКОЈ ДОКУМЕНТ ДОНЕСЕН ЗА РИО ТИНТО Е ЕДНА ГОДИНА ОД НАС. ТОА БЕШЕ ИЗГОВОР ЗА НЕКОИ ДА КАЖАТ: ДА, ОВА Е ГРАБЕЖ И ЗАТОА ПРОТЕСТИРАМЕ ПРОТИВ РИО ТИНТО, КАЖА ТОЈ. Мали рече дека „нема да се донесе ниедна одлука без граѓаните кои живеат таму“ и без завршена студија за влијанието врз животната средина и порача дека е изненаден од протестите што се случуваат во Србија. – Кому му одговара толку силна Србија, да има стапка на невработеност од 10,5 отсто, колку што имавме минатиот квартал? Во околината, никому. Затоа имаме поголем притисок, да се врати Србија во минатото, кажа Мали. Втора сабота граѓаните во Србија ги блокираа патиштата во повеќе градови, откако неколку еколошки организации ги повикаа да протестираат против рудникот за литиум на Рио Тинто и Законот за експропријација, кој сè уште не е потпишан од претседателот на Србија, и Законот за референдум и Народна иницијатива....

Најдобриот светски тенисер, Новак Ѓоковиќ ги поддржа протестите во Србија против законските измени кои според демонстрантите власта ги прави по мерка на гигантот „Рио Тинто“ и проектот за отворање рудник за литиум во областа Јадар. Тенисерот на својот профил на социјалните мрежи објави фотографија од масовните демонстрации кои се одржаа вчера. „Чистиот воздух, водата и храната се клучот за здравјето. Без тоа, секој збор за ‘здравје’ е излишен“, напиша Ѓоковиќ. Граѓаните на Србија вчера ги блокираа патиштата во повеќе градови откако неколку еколошки организации ги повикаа да го изразат својот протест против Рио Тинто, Законот за експропријација и Законот за референдум и Народна иницијатива. Протестите беа претежно мирни, освен во Нови Сад, каде што дојде до тепачка во која беа повредени четири лица....

На 34-от Совет на Европската зелена партија, што поради Ковид-19 пандемијата се одржа онлајн, се усвои Резолуција за поддршка за интеграција на земјите од Западен Балкан во ЕУ. Во дефинирањето и усвојувањето на оваа Резолуција активно придонесе зелената партија ДОМ, која е полноправна членка на Европската зелена партија. Во Резолуцијата, Европските зелени потенцираат дека важен приоритет на надворешната политика на ЕУ треба да биде интеграцијата, демократизацијата, стабилизацијата и помирувањето на земјите од Западен Балкан. Истакнуваат дека интеграцијата на сите држави од овој регион е историска одговорност и геополитичка стратешка потреба за да се обезбеди демократска и мирна иднина на европскиот континент. Европските зелени инсистираат на забрзување на политиката на проширување на ЕУ и силно ја поддржуваат трансформацијата на земјите од Западен Балкан кон одржливи, демократски и граѓански општества во кои се почитуваат индивидуалните права и слободи, владеење на правото и борба против корупцијата, слободни медиуми и почитување на правата на малцинствата и се против било какви промени на границите, особено врз основа на етнички поделби. Со оваа Резолуција, Европските зелени ја повикуваат Бугарија да го отвори патот за првата меѓувладина конференција и да ги решава спорните прашања со Северна Македонија билатерално, отстранувајќи го тоа како предуслов за започнување на пристапните преговори. Го повикуваат Европскиот совет да одржи меѓувладини конференции за директно отпочнување на пристапните преговори со Македонија и Албанија, најбрзо што е можно. Исто така, со Резолуцијата се повикуваат земјите од Западен Балкан да ја подобрат соработката во борбата против организираниот криминал. Се апелира на поинтензивна соработка со Зелените, граѓанското општество и експертите, за да се заштити природата и биодиверзитетот во регионот, итна замена на термоцентралите на јаглен со обновливи извори на енергија и поддршка на борбата против климатската криза и обезбедување зелена и праведна транзиција во регионот. Со почит, ДОМ Канцеларија за односи со јавност...

ВМРО-ДПМНЕ известува дека до партиските органи на ВМРО-ДПМНЕ, пристигна кандидатура за претседател на ВМРО-ДПМНЕ потпишана од 50 делегати за проф. д-р Христијан Мицкоски. Ви ја пренесуваме во целост кандидатурата за проф. д-р Христијан Мицкоски. „Врз основа на член 34 од Статутот на ВМРО-ДПМНЕ ние како делегати на партискиот конгрес на ВМРО-ДПМНЕ покренуваме формална иницијатива за номинација на проф. д-р Христијан Мицкоски во изборот за претседател на ВМРО-ДПМНЕ. Дадената недвосмислена и безрезервна поддршка е резултат на неговото досегашно одговорно, чесно и квалитетно раководење со партијата, големиот напор кој што го вложи кон стабилизирање на состојбите во најголемата политичка партија во нашата земја, како и на постигнатите позитивни изборни резултати од последните локални избори. Веруваме дека повторниот избор на проф. д-р Христијан Мицкоски ќе биде дополнителен поттик за идното раководство, членовите на партијата и граѓаните на Македонија уште повеќе заеднички да се заложат за целосно спроведување на програмските определби на партијата со силен државотворен карактер и кадровски капацитети кои ветуваат непречен политички и економски развој на нашата татковина. Преку партијата на која најмногу и веруваат граѓаните и под водство на нејзиниот претседател Мицкоски силно го отвораме патот за модернизирање на нашата држава, владеењето на правото, засилување на борбата против корупцијата, побрзо надминување на тешките здравствени и економски предизвици, зголемување на животниот стандард на нашите граѓани, унапредување на односите со соседите, партнерите и сите пријателски држави и зголемување на брзината со која се движиме по патот на европската интеграција. Партијата ВМРО-ДПМНЕ била, е и останува најцврстиот гарант за зацврстување на државноста, независноста, мирот, стабилноста, безбедноста, економскиот развој и историскиот континуитет на Македонија“. Меѓу потпишаните делегати на 17-тиот Конгрес на ВМРО-ДПМНЕ за кандидатурата на проф. д-р Христијан Мицкоски се и пратениците Дафина Стојаноска, Антонијо Милошески, Ели Панова, градоначалниците Тимчо Муцунски, Бобан Стефковски, Александар Стојкоски, Орце Ѓорѓиевски, Дарко Костовски, Борче Митевски, Стевче Трпковски, Коста Маневски, Иван Јорданов, Кирил Пецаков, Борче Јовчески. Потписници на кандидатурата се и претседателите на униите, Жаклина Пешевска Унија на жени на ВМРО-ДПМНЕ, Сергеј Попов на Унија на млади сили, претседателот на Патриотскиот институт Александар Пандов, како и директорот на Центарот за комуникации Луке Галески, и портпаролот на ВМРО-ДПМНЕ Димче Арсовски. Меѓу потписниците се Владимир Нелоски, Борко Ристовски, Илија Димовски, Оливер Шамбевски....

И оваа година, на Меѓународниот ден на волонтерите, 5 декември, им оддаваме огромно признание на волонтерите за нивната неуморна посветеност и за безусловната љубов која ја даваат во многу процеси за доброто на заедниците, општеството и во поддршка на многу наши сограѓани кои не смеат да бидат запоставени, напиша премиерот Зоран Заев на неговиот фејсбук профил. Оваа година, вели Заев, ја видовме инспиративната сила на волонтерите за време на пожарите на шумите во земјава, како и нивната континуирана активност да учествуваат во поддршката на нашите сограѓани во справувањето со заканите од пандемијата со КОВИД-19. – Благородната самопрегорност на волонтерите инспирира да ја шириме мисијата на волонтерството и солидарноста. На овој ден, да ги охрабриме сите да се вклучат и да учествуваат во креирање на хуманото лице на заедниците, да прифатат доброволна акција за подобра иднина и да бидат горди дека биле дел од таа мисија, објави на фејсбук премиерот Зоран Заев....

Струмичкото комунално претпријатие ја почна акцијата за кроење на дрворедите низ Струмица. Денеска со механизација и рачно се работеше на улицата „Маршал Тито“, а уредувањето ќе продолжи и на други улици во наредните денови. -Денеска се уредуваа дрворедите во Старата струмичка чаршија, на потегот од „Топчето“ до хотел „Централ“. Им благодариме на граѓаните што ги отстранија своите возила од оваа улица за да можеме непречено да работиме, информираат од ЈПКД „Комуналец“. Додаваат дека граѓаните навремено ќе бидат информирани за распоредот на улиците каде ќе се врши кроење на дворедите за да можат да ги отстранат своите возила за да може механизацијата и вработените да работат. рт/хс/...

Штипскиот Музеј до крајот на годината треба да ја заврши валоризацијата на старата штипска населба Ново Село. Директорот на Заводот за заштита на споменици и Музеј на град-Штип, Митко Штерјов за МИА појаснува дека валоризацијата ќе значи заштитата на автентичната староградска архитектира и да се вклопи и во Деталниот урбанистички план(ДУП), како и во Генерален урбанистички план(ГУП). – Сите куќи што се заштитени,односно Ново Село е заштитен како целина и сите куќи, целата населба се става под заштита и сите куќи кои со текот на времето ќе се реконструираат, секој објект, којшто ќе се прави ќе ја има онаа потребна заштита и ќе биде вклопен во урбанистичкиот план, вели Штерјов. Појаснува дека со валоризацијата ќе се знае секоја куќа колку може да чини, до каде може да се изгради, колку може да се реконструира, потоа да се и креваат спратови или како и да се заштитуваат фасадите. Градоначалникот на Општина Штип, Иван Јорданов вели дека жали што општината не ги прафитила средствата од европската банка за изградба на четирите куќи во Музеј. Најавува дека ќе се бараат средства повторно од Европските фондови и Програмата за меѓугранична соработка. – Имаме стратегија и план, во наредниот период да аплицираме до европските фондови, но исто така и можност за финансирање од страна на Општина Штип, од страна на приватните лица во чија сопственост се дел од овие куќи, за да го вратиме стариот сјај и автентичноста на овој дел од градот, вели Јорданов. Голем дел од куќите во штипско Ново Село чекаат на санација, а некои од нив пополека и самите се уриваат. Оваа стара штипска населба е дел од македонската историја, а за сопствениците на старите куќи пишуваат историчарите и штипските хроничари....

Ќе направам се да се изнајде решението со Бугарија, ако не се најде сега, не верувам дека ќе се најде во 2022 година. Меѓу 14 декември и 15 јануари е периодот кога може да се одржи Советот за општи работи. Тоа е можност да се исчекори напред и, конечно, по 16 и пол години да почнеме преговори. Во прашање се недели, рече Зоран Заев. Смета дека ова е значаен период што бара поголема одговорност и дека е потребно стабилно мнозинство и Влада што со влезот на Алтернатива е обезбедено. – Лично мислам дека треба да им е јасно и на Бугарија и на Европа, дека во најмала рака неизвесноста после мене е поприсутна затоа што ме знаат каков сум, какви политики водам и кон што тежнеам и затоа кажувам дека е ова најпозитивен период да се изнајде решение. За мене најважно во државата е евроатлантскиот пат и ова што е почнато со Бугарија. На крајот сме, во фотофиниш, и не може вака да се остави. Јасно е утврдена целта кога тоа може да се заврши, следува период кога Франција ќе претседава и изборите кои таму ќе бидат напролет, така што мал е периодот да се најде прозорец за решение на спорот помеѓу Македонија и Бугарија, истакна Заев одговарајќи на новинарски прашања по потпишаниот договор за соработка со лидерот на Алтернатива Африм Гаши. Горд е, рече и на одлуките што ги донел во изминатиот период и верува дека и народот е убеден дека тоа вистинскиот пат и нема друг по кој државата може да се интегрира во ЕУ и во НАТО. – А секако и да се интегрираме дома. Тие одлуки имаат и своја тежина, додаде Заев. Тој повтори дека е во оставка од двете функции, лидерската и партиската, и дека за кадровските решенија што ги предлага Алтернатива ќе одлучува новиот мандатар....

Општина Кисела Вода, Волонтерски Центар Скопје и „За почиста Македонија“ започнаа со волонтерска акција за чистење на Расадник и обезбедување на донации за социјално загрозените лица, во рамки на одбележувањето на 5 декември – Меѓународен ден на волонтерите, информира Општина Кисела Вода. Во соопштението се наведува дека градоначалникот на Општина Кисела Вода, Орце Ѓорѓиески предал донација за Центарот за деца од улица и за социјално загрозените семејства од Кисела Вода, по што, од Домот на култура-Кино Кисела Вода, заедно со волонтерите се упатил во Расадник и учествувал во големата акција за чистење на овој запуштен дел од општината. -Во знак на поддршка на волонтерството како важен акт кон подобро општество, Општина Кисела Вода се вклучи во организирање на денешниот настан кој има социјална и еколошка компонента. Дониравме, но и ги повикавме сите наши жители да бидат дел од акцијата за донирање на социјално загрозените од овој дел на градот, да ја покажат својата хуманост кон оние што имаат помалку. Паралелно сме вклучени во акцијата за чистење. Во општина Кисела Вода веќе неколку седмици тече големата акција за генерално чистење во сите месни и урбани заедници, но денес ги повикавме и жителите, нашите соседи, да излезат на терен заедно со службите и заеднички да го исчистиме Расадник. Благодарни сме на сите оние што се одзваа на повикот и што дадоа свој придонес во поттикнување на свеста за волонтерството, хуманоста и екологијата, изјави Ѓорѓиевски. Од Општината додаваат дека чистењето се одвивало рачно и со механизација, додека за волонтерите биле обезбедени ракавици, вреќи и топол напиток во Домот на културата во Кисела Вода, каде заинтересираните можеа да донираат и да слушнат за активностите што ги нуди Еразмус + програмата за младите лица....

Универзитетот во Тетово организираше турнир во шах во чест на осумдесет и првиот роденден на основачот на установата проф. д-р Фадил Сулејмани. Турнирот се одржа во спортската сала на Универзитетот со поддршка на шаховскиот клуб Шкендија од Тетово. –Овој турнир веќе стана традиционална манифестација организирана во чест на роденденот (5 декември 1940 г.), на основачот и прв ректор на Универзитетот во Тетово, проф. д-р Фадил Сулејмани. На овој турнир учествуваа вкупно 30 шахисти, сите студенти од различни академски единици на нашиот Универзитет. На крајот од 9-те кола беа прогласени победниците, а првите три места беа наградени со пехари. За победник на овој турнир беше прогласен студентот Башким Лума, кој собра вкупно осум поени. Второто место го освои Премтим Јакупи додека трето Гелдон Ибиши, информираат од Универзитетот во Тетово. Натпреварите се одржуваа по швајцарски систем со девет круга и ограничено време од десет минути за секој играч. Доделени се медали и за позициите од четврто до седмо место. Исто така, беа доделени сертификати на сите натпреварувачи во знак на благодарност за учеството на овој турнир....

Во последните 24 часа, регистрирани се 276 нови позитивни случаи на САРС КоВ-2од направени 2.720 тестирања, пријавени се вкупно 10 починати лица, пет во изминатото деноноќие и пет преку системот „Миј Термин“ и 249 оздравени пациенти, информира Министерството за здравство, согласно податоците од Институтот за јавно здравје. Од 276 нови случаи на КОВИД-19, од Скопје се 130, Битола – 35, Прилеп – 17, Охрид – 14, Куманово – 13, Штип – 10, Кавадарци – 9, Струмица – 7,Крива Паланка – 6, Тетово – 5, Кочани, Свети Николе и Пробиштип – по 4, Велес и Ресен – по 3, Гевгелија, Неготино и Богданци – по 2, Гостивар, Кичево, Струга,Радовиш, Делчево и Македонски Брод – по 1. Од 249 оздравени пациенти, од Скопје се 111, Битола – 35, Прилеп – 22, Кавадарци – 18, Штип – 9, Велес – 8, Куманово и Делчево – по 7, Кочани и Ресен – по 6, Берово, Виница и Кратово – по 3, Свети Николе – 2, Пробиштип, Неготино, Кичево, Радовиш, Македонски Брод, Демир Хисар, Крушево, Македонска Каменица и Пехчево – по 1. Во текот на изминатите 24 часа регистрирани се 5 починати лица: 2 починати лица од Скопје (82г и 82г), по едно починато лице од Свети Николе (68г), Кратово (88г)и Демир Хисар (55г). Сите пријавени лица се починати во болнички услови. Дополнително, согласно Регистарот на умрени лица со дијагноза КОВИД-19 од „Мој Термин“, пријавени се 5 починати лица со датум на смрт од 21.11.2021 до 28.11.2021. Регистрираните починати лица се од Скопје (3), Прилеп (1), Кичево (1). Починатите лица се на возраст од 29 до 79 години. Две лица се починати во домашни услови и три лица во болнички услови. Направени се 2.720 тестови преку: ИЈЗ-213, ЦЈЗ Скопје-35, ЦЈЗ Битола-72, ЦЈЗ Прилеп-50, ЦЈЗ Тетово–0, ЦЈЗ Куманово-61, Клиника за инфективни болести и фебрилни состојби-0, Судска медицина-0, лабораторија болница Козле-0, УК Пулмологија со алергологија –1,ГОБ 8-ми Септември-0, Институт за микробиологија–175,Жан Митрев (Филип Втори)-60, Авицена-1108, Биотек-107, Систина-46, лабораторија Лаор-255, Синлаб-20, Ремедика-0, Плодност–48, Генеа-7, Никоб лаб-270,ВФВ Медикал-37, Ели Медика-30, Ројал Медика–60,Спектра-ММ-6, Рапид Лаб–5, Жан Митрев Струмица–3,Нова Лаб Дијагностика–0, ЈЗУ и ПЗУ (рапид тест) –вкупно 1.051. Досега во земјата се направени вкупно 1.484.645 тестирањана Ковид-19. Вкупната бројка на КОВИД-дијагностицирани лица во нашата земја од почетокот на епидемијата изнесува 217.301,бројот на оздравени пациенти е 203.574, на починати е 7.641, а бројот на активни случаи изнесува 6.086....

На покана на Алијансата на либерали и демократи за Европа (АЛДЕ), заменик претседателот на Владата задолжен за европски прашања Никола Димитров денеска учествуваше на регионалната конференција „Обновен наратив за забрзана интеграција во ЕУ”, како говорник на панелот „Иднината на ЕУ: Во кој правец се движи Европа во 2021?”. Вицепремиерот Димитров се осврна на заложбите на Македонија за интеграција во Европската Унија, вклучително и вложениот политички капитал на основа на европското ветување. – Ниту една европска земја одделно не е доволно силна за справување со современите предизвици, единствениот начин е европскиот проект за обединување на континентот што без овој регион – Западниот Балкан, секогаш ќе биде нецелосен и недовршен. Македонија е приказна на надеж за овој проект, така што нашиот (не)успех е (не)успех и за ЕУ, ако ЕУ е сила што влече за добро. Одговоривме на многу стриктни услови, време е да добиеме праведна валидација, ако ЕУ е заедница на вредности, рече Димитров. Во тој контекст, дополни дека европскиот проект се темели на градење заеднички европски идентитет заснован на вредности како главна придобивка од процесот. – Градењето на идентитетот е важно бидејќи лесно може да биде злоупотребено преку националистички наративи кои се всушност против националните интереси, како што беше во случајот со спорот за името што го имавме со Грција. Европа во 21от век треба да подразбира натпревар на идеи и достигнувања коишто ќе го подобрат нашиот живот и ќе обезбедат подобра почетна позиција за идните генерации – области како владеење на правото, дигитализација, зелена економија. Не е пристојно да се предизвикува соседот за прашања кои се многу внатрешни и интимни, како што е јазикот, и не е корисно да ја жртвуваме нашата иднина за минатото и историјата, рече Димитров. На панелот, како што соопштија од СЕП, се обратиле и европски политичари и млади либерали, меѓу кои европратеникот Илхан Ќучук, австрискиот пратеник Хелмут Брандштетер и француската пратеничка Лилиана Танги (преку видео конференциска врска) и испратиле порака дека европскиот проект мора да испорача успех преку македонското европско досие. На маргините на конференцијата, вицепремиерот Димитров остварил средби со европратеникот Ќучук, на која биле разговарани актуелните прашања во врска со македонско-бугарските односи, како и со словенечкиот министер за економски развој и технологија Здравко Почивалшек, во контекст на продлабочување на економската соработка....

Премиерот Зоран Заев и лидерот на Алтернатива Африм Гаши денеска во Клубот на пратениците ја потпишаa програмата за заедничко дејствување и приклучување на партијата во Владата и парламентарното мнозинство. Заев и Гаши нагласија дека земјата излегува од политичката криза, има стабилно парламентарно мнозинство и стабилна Влада, што значи дека новата проширена коалиција ја презема одговорноста за сигурна иднина и на државата и на граѓаните на Македонија. Заедничка констатација која ја зајакнува новата коалиција, информира Заев, е дека на С Македонија и на граѓаните не им се потребни предвремени или вонредни парламентарни избори. – Вонредни избори единствено би ја втуранале земјата во нова политичка, економска и општествена неизвесност, но и ризик одново да се закочат европските интеграции. Доста беа кризи и неизвесности. На нашата татковина и треба мирен и стабилен период, рече Заев. Затоа, наведе тој, постигнавме договор со Алтернатива за Влада и парламентарно мнозинство до крајот на актуелниот мандат, односно до 2024 година со амбиции и да продолжи. – Нема стабилност со вонредни избори. Затоа вонредни избори нема да има за да има стабилност, дециден беше премиерот. Постигнатиот договор, потенцира Заев, е гаранција дека имаме мнозинство кое ќе работи на решенија за сериозните актуелни предизвици како што се обезбедувањето континуитет и успешен епилог на процесот за почеток на преговорите за членство во ЕУ, односно изнаоѓање решение со Република Бугарија, справување со КОВИД -19 пандемијата и глобалната енергетска криза. Тој упати порака до ЕУ и посебно, како што рече, до пријателска Бугарија. – Во С Македонија има зголемено и стабилно парламентарно мнозинство. Подготвени сме на европски начин со дијалог и меѓусебно почитување и разбирање да го надминеме проблемот и да го сочуваме и надградиме нашето пријателство помеѓу двете држави и двата народи. Ние сме братски народи, порача премиерот Заев. Во пораката до граѓаните, наведе дека почеток на преговорите ни треба веднаш затоа што ги имаме исполнето сите услови. – Европеизација веднаш, европеизација постојано. Тоа е наша заложба на која ќе работиме со полн капацитет. Имаме мнозинство за стабилна влада и за сериозни решенија кои ќе ги држат здравствениот и енергетскиот систем стабилни, изјави премиерот. Заев појасни дека се воделе од императивот за стабилно парламентарно мнозинство и за да се стави крај на опструкциите во Собранието. – Ефикасноста на Собранието е во интерес на граѓаните и нивните потреби, да ги совладаме блокадите низ дијалог во Парламентот и да и дадеме сила на владата во спроведувањето на програмските политики околу кои постигнавме согласност и кои се во интерес на граѓаните, рече претседателот на Владата. Новото мнозинство, истакна, е одговор на барањата и потребите на граѓаните за стабилност. – Се здруживме околу заедничката определба дека во овие моменти најважно е функционирањето на институциите со полн капацитет и преземањето јасно утврдена одговорност пред граѓаните. Тоа е исклучително важно во време на сериозни предизвици дома и на глобален план, рече Заев. Информира дека Алтернатива ја презема одговорноста со свои кадри и од своите редови ќе назначи министер за здравство, министер за ИОА и министер без рестор задолжен за дијаспората. Владата, како што рече, ќе воведе неколку министри без ресор, со цел подобро да се справува со сите домашни и глобални предизвици. Од страна на Алтернатива ќе бидат назначени и три заменици-министри, од кои еден во МОН, еден во Министерството за култура, а за третиот ресор останува дополнително да се прецизира, иако било разговарано за заменик министер за земјоделство. Алтернатива ќе преземе одговорност и во менаџирањето на управувачките раководните органи во повеќе институции на централно и на подрачно ниво. Меѓу нив од поважните се МЕПСО, ФЗОМ, Железници и Транспорт, Клинички центар – Тетово, Агенција за странски инвестиции и други. Земјата излегува од политичка криза, констатира претседателот на Алтернатива Гаши и истакна дека од вчера парламентарното мнозинство е зголемено, стабилизирано и проширено. – Шеесет и четири пратеници ќе бидат од парламентарното мнозинство и ќе работат искрено и сериозно, со цел да се излезе и од здравствената, и од енергетската и од економската криза, во која сите ние се наоѓаме и ја чувствуваме, изјави Гаши. Според него, Алтернатива била исправена пред многу тежок период и предизвикот дали да продолжи таму каде што е или да придонесе во историскиот процес за отворањето на преговорите за пристапување во ЕУ. Примарно било да бидат во функција и во интерес на државната и регионалната стабилност и во интерес на Албанците и на сите граѓани во нашата држава. Гаши ги престави деветте точки односно договорените принципи и начела со кои ќе се надгради односно дополни владината програма. Тие се однесуваат најмногу на европските интеграции, на економскиот добробит за народот, на рамномерниот регионален развој, правната држава и на брзата и квалитетна испорака на услуги кон граѓаните од страна на институциите. Инаку, договорено е и Владата на Република Македонија да ги мобилизира сите капацитети на државата и општеството со цел отворање на преговорите со ЕУ, успешно комплетирање на сите поглавја и полноправно членство во ЕУ како стратешка цел, во најкус можен временски рок. – Владата ќе испрати официјално барање до Европската Комисија со кое ќе побара тим од независни експерти кои ќе извршат меѓународна истрага на процеси за кои постојат сомневања дека врз нив било вршено политичко влијание, како што се: Монструм, Алфа, Диво Насеље, Малиот Алмир, беше кажано на прес-конференцијата. Владата ќе усвои и нов Закон за рамноправен регионален развој и ќе работи на отстранување на сите пречки за да овозможи развој и на Липковскиот регион со цел овој регион да стане рамноправен и еднаков со сите други региони во државата во однос на развојните компоненти. Согласно договорот, Владата ќе развива и имплементира политики за унапредување на правата и интересите на сите индивидуи и заедници во земјата и дополнително за поддршка на семејството како една од суштинските компоненти на општествениот живот. Ќе се направи и анализа на вкупните закони и политики во однос на борбата против криминалот и корупцијата и истите ќе ги унапредува во насока на поефикасно спроведување. Ќе се редефинира и Законот за извршители водејќи се пред се од барањата на граѓаните, со цел да биде во поголема функција на нивните интереси , а потоа и на интересите на институциите. – Владата ќе иницира процес на градење Национална стратегија за развој и подигнување на квалитетот во образованието, во кој ќе настојува да учествуваат сите чинители од образовниот процес, како и политичките партии, граѓанските организации и меѓународни институции, а во меѓувреме Владата ќе испрати и официјален повик до меѓународните институции за евалуација на домашните високообразовни институции. Во договорот со Алтернатива стои и дека Владата ќе застане во економска заштита на населението и нема да дозволи поголемо покачување на цената на струјата од 20 проценти во текот на 2022 година, преку субвенционирање на граѓаните и компаниите и други економски мерки. Владата ќе работи и на зголемување на квалитетот, ефикасноста и експедитивноста на испораката на услуги кон граѓаните и на реализацијата на проекти на сите нивоа, преку зголемување на нивото на одговорност кое носителите на јавни функции и државните службеници го преземаат пред граѓаните....

Портпаролот на ВМРО-ДПМНЕ, Наум Стоилковски на денешната прес-конференција одговарајќи на новинарско прашање за коментар околу СДСМ и Алтернатива во Владата, посочи дека очигледно Алтернатива наместо партија којашто сака да промени нешто во општеството и да стане коректор на искривените вредности, станува партнер на криминалната дружина на власт СДСМ и ДУИ. „Исто така ја користам приликава и да прашаме до кога политичките партии од власта кои што не се дел од СДСМ/ДУИ и Алтернатива, ќе бидат слепи и неми посматрачи на сите криминали, неправди, и политички договори кои се на штета на сите граѓани во Македонија“, запраша Стоилковски. Стоилковски одговарајќи на прашањето посочи –„Од друга страна Заев покажа дека е спремен да ја плати секоја цена само за да продолжи со крадењето, тендерите и разградувањето на државата. Но и денес СДСМ станува партија на многу проблеми и денес Заев е повеќе од порано заложник на Али Ахмети и на ДУИ“. Стоилковски додаде дека не е прашање дали, туку кога час поскоро оваа власт ќе падне....

Денеска е нападната воена база на САД и западната коалиција во близина на сириското село Ал Танф беа, јави телевизијата Ал Арабија. Во областа биле извршени неколку напади во близина на базата на коалицијата во Ал Танф, која се наоѓа во сириската провинција Хомс во близина на границата со Ирак. Во базата се слушнале неколку експлозии, јави сириската телевизија. Нема информации за евентуални штети или жртви како последица на инцидентот. На крајот на октомври, базата Ал Танф беше цел на ракетен оган и воздушни напади со беспилотни летала. Претставникот на американската команда во Ирак тогаш го потврди нападот врз овој објект, прецизирајќи дека американската војска немала загуби, туку само материјална штета. Во ноември, Њујорк Тајмс објави дека базата Ал Танф била нападната од проирански сили како одговор на израелските воздушни напади врз нивните бази во Сирија....

Денеска (05.12.2021) во периодот од 00.30 часот до 02.00 часот, на подрачјето на Полициска станица Битола, полициски службеници и инспектори од Државниот пазарен инспекторат и Управата за јавни приходи спровеле заедничка акциска контрола во угостителски објекти во Битола. При контролата биле затекнати 4 лица без Ковид-сертификат и едно лице со лажен Ковид-сертификат, за што се изречени соодветни санкции. За време на контролата од страна на УЈП и ДПИ регистрирани се и други неправилности за кои, исто така, се изречени соодветни мерки....

По прес конференцијата, портпаролот на ВМРО-ДПМНЕ, Наум Стоилковски беше запрашан за коментар за ревизија на судските случаи. Тој посочи дека во нормална држава тоа би требало да биде работа на обвинители и судски органи. „Што се однесува до прашањето за договорените ревизии на судските случаи, тоа во нормална држава би требало да е работа на обвинители и судски органи. За жал се додека на маса се збори за овие работи, а не во судница, имаме такви епизоди какви што сведочиме“, посочи Стоилковски. „Јавноста не треба да наседнува на фолклорот на СДСМ и Алтернатива. Тоа е само завесата со којашто тие упорно манипулираат со чувствата на граѓаните, а зад таа завеса се функциите и министерствата кои што си ги делат и коишто им носат приходи. Секогаш кога се одвива некаква кражба тие ја вртат темата кон националната реторика, судските случаи, и јавноста не треба да наседнува повеќе на веќе видени епизоди“, заклучи Стоилковски....

Тројца скијачи загинаа, а двајца се повредени во лавина во централна Австрија, соопштија денеска локалните власти. Жртвите биле дел од група од 11 скијачи, од кои осум биле погодени од лавина широка околу 200 метри додека се движеле по патека за време на скијачката тура вчера во областа Твенг, во провинцијата Салцбург. Тројца скијачи биле затрупани од лавината, додека двајца биле делумно затрупани и успеале да се ослободат, соопшти регионалната полиција. Спасувачите успеале да лоцираат двајца затрупани скијачи користејќи ги нивните уреди за пребарување, но едниот веќе бил мртов, а другиот подоцна починал во болница во Клагенфурт. Третиот затрупан скијач не носел уред за пребарување и неговото тело било пронајдено околу четири часа по лавината. Жртвите се Австријци, двајца на 19-годишна возраст, и еден на 24-годишна возраст. Двајцата повредени скијачи се пренесени во локалната болница....

Република Словенија ќе и помага на Република Македонија во развојот на бањски туризам. Ова било договорено на денешната средба меѓу министерот за економија Крешник Бектеши и словенечкиот вицепремиер и министер за економски развој и технологија Здравко Почивалшек. На средбата, меѓу другото, било истакнато дека Република Словенија безрезервно ја поддржува Република Македонија за добивање на датум за преговори со ЕУ. – Денеска имавме можност да разговараме за продлабочување на нашата соработка, посебно во развој на туризмот, бањскиот туризам, за што Република Словенија има големо искуство. Нашата држава има голем капацитет за развој на бањски туризам и се договоривме да организираме средби меѓу нивните и нашите стопанственици. Ги повикав да ја посетат нашата држава, да бидат директно запознаени со потенцијалите кои ги имаме, рече Бектеши, додавајќи дека на средбата било разговарано и за зголемување на трговската размена. – Првичните бројки од 2021, покажуваат дека се враќаме во пред ковид периодот и во делот на извозот и во увозот. Имаме многу сериозни словенечки компании кои веќе работат во нашата држава. Има компании кои се заинтересирани да дојдат и да инвестираат кај нас, особено во автомобилската индустрија. За наша радост, има и наши компании кои работат во Република Словенија, особено во металуршката индустрија и други области, истакна Бектеши, изразувајќи надеж дека соработката меѓу двете држави ќе продолжи, се со цел да се креираат нови работни места, потоа да се споделат добрите искуства кои Република Словенија ги креирала на патот кон ЕУ. Словенечкиот вицепремиер и министер за економски развој и технологија Здравко Почивалшек рече дека му е чест што повторно се сретнува со министерот Бектеши. – Веќе со години се среќаваме и го следиме развојот на економската соработка меѓу Република Словенија и Република Македонија. За несреќа, поради пандемијата, економската соработка малку опадна, но на наше задоволство, во последните девет месеци тоа го надокнадивме и ја зголемивме за 30 отсто. Радува големата инвестициска размена, на словенските инвестиции кај вас и обратно. Словенечките инвестиции во Македонија се големи, изнесуваат над 400 милиони евра и преку 2.500 вработени. Радува и опсегот на македонски инвестиции во Словенија, кои во последните години се зголемуваат. Според податоците тие изнесуваат преку 30 милиони евра, изјави Почивалшек, кој ја посочи компанијата ИГМ, која ги зголемила инвестициите во металургијата. Тој посочи дека Словенија сè уште има во државна сопственост голем дел од економијата, особено туризмот и дека со министерот Бектеши се договориле за инвестициски вложувања во туризмот, особено бањскиот туризам. Словенечкиот вицепремиер истакна дека на министерот Бектеши уште еднаш му ја потврдил безрезервната поддршка која Република Словенија и ја дава на Република Македонија за добивање на датум за преговори со ЕУ. – На самиот на ЕУ кој се одржа во Брдо успеавме проширувањето на ЕУ да влезе во Декларација. Словенечките барања беа да се внесат и конкретни датуми. Ќе направиме се, уште во текот на словенечкото претседателство да се решат проблемите, но се надеваме дека ќе најдете решение со соседите. Словенија безрезервно ја поддржува Република Македонија за почеток на преговори со ЕУ, нагласи словенечкиот вицепремиер и министер Почивалшек....

Жителите на Велика Британија ја критикуваа главната новогодишна елка во земјата, која традиционално ја подарува Норвешка и се поставува на плоштадот Трафалгар во главниот град. Оваа година дрвото со ретка крошна беше споредено со фризурата на британскиот премиер Борис Џонсон, пренесе Би-Би-Си. Секоја година Норвешка им испраќа на Британците елка во знак на благодарност за поддршката на Велика Британија за време на Втората светска војна. Празничното дрво достигнува над 20 метри височина. Меѓутоа, овојпат локалните жители го критикуваа изгледот на дрвото поради состојбата на крошната. Некои читатели сугерираа дека само дел од дрвото е доставено во Лондон и се прашуваат кога ќе бидат испорачани другите гранки. Учесниците во онлајн дискусиите се крајно креативни, па некои од коментарите што можат да се прочитаат се: „Да не зела Европската Унија дел од крошната?“, „И со Норвешка ли се скаравме?“, „Боже мој, дрвово да не е мамурно?“. Од кабинетот на градоначалникот објаснија дека дрвото е донесено од вистинска шума, па затоа крошната не може да биде погуста како дрвјата што се одгледуваат специјално за празникот. На официјалниот профил на Твитер на дрвото се вели дека дел од крошната не исчезнал, туку едноставно во пандемијата на Ковид гранките мора да одржуваат и физичка дистанца....

Додека молчат од СДСМ и Фондот за иновации за одредени скандалозни таканаречени иновации кои што тие самите си ги нарекуваат иновации, односно поддржани проекти што ги поддржуваат со парите на граѓаните, истите тие граѓани чии пари ги трошат тонат секојдневно во сиромаштија. Додека СДСМ и Фондот поддржуваат проекти од типот – рецепта за пица пинса романа во вредност од 2.4 милиони денари или проекти за некакви иновации на најблиските луѓе на Зоран Заев од Струмица, инаку тоа е проект поддржан од човек познат како Миле Милановиќ и најголем промотор на Зоран Заев, и дел од раководството претходно на СДСМ на Струмица, најголем дел од граѓаните на крајот од месецот остануваат без пари. Еве денес сакаме да јавно да прашаме, дали Фондот за иновации дал пари за проект, односно дал 2.7 милиони денари на поранешниот директор на Фондот за здравство и телеком од СДСМ, Рубинчо Заревски? Овој човек беше директор во времето на СДСМ и во владата на Владо Бучковски. Фондот за иновации работи полошо од било кога ги троши парите недомаќински, полошо од било кога и од било која институција на СДСМ. Најголем дел од проектите кои се поддржуваат, се проекти кои се залудно потрошени пари од страна на овој Фондот за иновации, пари на граѓаните. Граѓаните сами коментираат и самите гледаат и воочуваат дека парите завршуваат кај блиски луѓе до СДСМ, а не кај вистинските иноватори кои што не можат да се здобијат со било каков проект. Се плаќаат во милионски суми рецепти за пица, никој не знае каква е успешноста на проектите и никој не води никаква ревизија како се потрошени парите и каде завршуваат. Но, ревизија ќе има за секој еден проект откако ќе се смени власта. Начинот на испумпување пари од Фондот за иновации кој го осмисли СДСМ мора да еднаш за секогаш да прекине. Коста Петров мора да сфати дека не располага со негови домашни пари, туку со парите на граѓаните, тоа се државни пари и за тоа следи одговорност доколку лошо постапува. Времето на делење пари по пријатели, познаници и партиски поддржувачи на СДСМ мора да заврши и конечно да се гледа вистинскиот квалитет....

12 дена нема никаков одговор, ниту одговорност, никаква реакција за трагедијата во којашто изгореа 45-мина како резултат на криминал и на корупција. 12 дена од автобуската несреќа во која загинаа 45 граѓани на Македонија, а власта нема одговори. 12 дена нема одговор како е можно автобусот на смртта 135 пати да ја мине границата без лиценца за меѓународен транспорт? 12 дена нема одговор дали навистина се менувани документи и автобус за превоз на 49 патници, е претворен во автобус за 54 патници? 12 дена нема одговор како е можно Инспектори да не можат да влезат во една фирма, одговорна за транспортот на смртта? 12 дена нема одговор дали коалицијата СДСМ/ДУИ и останувањето на власт е поважна од животот на граѓаните? 12 дена Македонија нема одговор и 12 дена Македонија повторно очекува одговор од истрага цитирам „не откривме ништо конкретно“ како за модуларната болница во Тетово. Почитувани за неполни 3 месеци 60 граѓани се пеплосани заради криминал и корупција, а одговорност нема. Коалицијата СДСМ /ДУИ ги обвинува граѓаните. Институциите во Македонија наместо истрага, си ја префрлаат одговорноста. А постои признание од директор на Инспекторатот за транспорт, дека автобусот на смртта не бил регистриран, и дека така вршел меѓународен транспорт и поминувал граница! Ова е повеќе од срамно, повеќе нечесно за било која власт и држава. Македонија најмалку го заслужува ова. Избори, смена на власт, кредибилна истрага со одговорност за сите криминали и за сите корупции....

Во текот на вчерашниот ден (04.12.2021) Министерството за внатрешни работи спроведе зајакната акциска контрола на територијата на Република Македонија за санкционирање на возила кои се движат со брзина поголема од дозволената, при што санкционирани се 239 возачи. Од нив, 18 возилa се движеле со брзина над 50 километри на час повеќе од дозволеното, а две возила се движеле со дури над 70 километри на час повеќе од дозволената брзина. Притоа, 74 возачи ја пречекориле брзината во населено место, а 165 надвор од населено место. Засилените акциски контроли продолжуваат и во наредните денови....

Прекинато водоснабдување денеска од 11:30 часот ќе имаат корисниците од улиците „Белградска“, „Самарџиска“ и „Алберт Станиќ“ во населбата Чаир. Од ЈП Водовод и Kанализација-Скопје информираа дека прекинот е поради уличен дефект ф 80 мм на ул. „Никола Мартиновски“ бр.21 во населбата Чаир, и ќе трае се до санирање на дефектот....

Си-Ен-Ен го отпушти водителот Крис Куомо поради поддршката за неговиот брат, поранешниот гувернер на Њујорк, Ендрју Куомо, во борбата против обвинувањата за сексуално вознемирување на жени кои биле вработени кај него. Одлуката е донесена откако Си-Ен-Ен соопшти дека се појавиле дополнителни информации за степенот на вмешаност на Крис Куомо во одбраната на неговиот постар брат. Ендрју Куомо поднесе оставка во август, откако обвинителството соопшти дека го малтретира персоналот, објавија американските медиуми. Крис Куомо рече дека е разочаран и оти тоа не е „начинот на кој тој би сакал да заврши неговото време на Си-Ен-Ен. МИА во средата пренесе дека Си-Ен-Ен го суспендираше својот водител Крис Куомо на неодредено време, откако се појавија детали за тоа како тој му помогнал на својот брат, поранешниот гувернер на Њујорк, Ендрју Куомо, да се соочи со обвинувањата за сексуално вознемирување, откриени претходно оваа година. Телевизиската мрежа објави дека документите објавени од њујоршкиот државен обвинител во понеделникот укажуваат на тоа дека Крис Куомо бил повеќе вклучен во одбраната на својот брат отколку што знаеле раководителите на Си-Ен-Ен. „Како резултат на сето ова, го суспендиравме Крис на неодредено време и чекаме дополнителни проценки“, соопштија во средата од Си-Ен-Ен. Водителот извршил притисок врз изворите поврзани со жртвите на неговиот брат и ги информирал соработниците на гувернерот за своите сознанија, активно помагајќи да се развие одбранбен план и одговор на обвинувањата. Канцеларијата на државниот обвинител Летиша Џејмс откри дека Ендрју Куомо сексуално вознемирувал најмалку 11 жени....

Петмина демонстранти се убиени, а најмалку 15 се уапсени откако безбедносните сили на Мјанмар утрово во Јангон извршија рација врз противниците на воениот удар во земјата, јави локалниот информативен портал „Мјанмар сега“. Очевидци од местото на настанот изјавија дека десетици луѓе се повредени. Фотографиите и видеата на социјалните мрежи покажуваат како возило удира во демонстранти и тела кои лежат на патот. Антивоените протести продолжуваат и покрај убиството на повеќе од 1.300 луѓе од државниот удар на 1 февруари. Протестите често се организираат во помали групи кои изразуваат противење на соборувањето на избраната влада предводена од нобеловката Аунг Су Чи и враќањето на воената власт. Опозициската влада во сенка соопшти дека е тажно да се види како се газат и убиваат мирни демонстранти....

Во текот на изминатата вечер (04/05.12.2021) во периодот од 23.00 до 05.00 часот спроведена е зајакната акциска контрола за санкционирање на возачи кои управуваат возила под дејство на алкохол на територијата на Република Македонија, при што санкционирани се 179 возачи. Од нив, 42 на територијата на СВР Скопје, 35 на територијата на СВР Битола, 29 на територија на СВР Тетово... Засилените акциски контроли продолжуваат и во наредните денови....

Донесена е Одлука за распределба на средства од Буџетот на Република Македонија за 2021 година за поддршка на имплементацијата на Декадата и Стратегијата за Ромите. – Со 14,9 милиони денари предвидени со оваа програма ќе се финансираат повеќе инфраструктурни проекти во ромските заедници во Крива Паланка, Кавадарци, Прилеп, Кочани, Ранковце, Делчево и Шуто Оризари, објавија од Владата на Република Македонија денеска на фејсбук....

Од утре, 6 декември, лабораториите за ковид во Ниш ќе престанат со работа поради недостиг на реагенси и медицински материјали, изјави за „Политика“ директорот на таа здравствена установа Милорад Јеркан. Според него, во петокот лабораториите вршеле анализи само за најитните, најтешките и најкритичните пациенти користејќи ги последните резерви бидејќи со месеци немало нови испораки. Јеркан рече дека уште на 28 септември испратиле официјално барање за обезбедување на реагенси и санитетски материјали. – Бидејќи во меѓувреме не добивме никаков одговор од Републичкиот фонд за здравствено осигурување (РФЗО), а во последниот бран имавме во просек од 2.300 до 2.750 пациенти дневно на клиниките за ковид, официјално го повторивме барањето на 16 ноември“, изјави Јеркан. Тој рече дека на 26 ноември, бидејќи сè уште никој од РФЗО не одговарал, била одржана итна, вонредна седница на Управниот одбор на Здравствениот дом, на која било констатирано дека установата е пред колапс и било одлучено веднаш д се испрати уште еден допис до Фондот за здравство. – На 2 декември добивме одговор од подружницата на РФЗО во Ниш дека „на нашата институција нема да и бидат исплатени дополнителни средства за набавка на медицински материјал бидејќи се потрошени сите средства предвидени за овие намени за 2021 година“, нагласи Јеркан. Тој додаде дека реагенсите не се ни споменати во дописот од РФЗО, иако се знае дека лабораториите не можат да работат без нив, односно не се можни анализи, брза дијагностика и одредување на потребната терапија за пациентите болни од Ковид-19. Јеркан рече дека Здравствениот дом после одговорот на РФЗО на 3 декември испратил писмо до премиерката на Србија Ана Брнабиќ и министерот за здравство доктор Златибор Лончар во кое бара да интервенираат и да помогнат за да нема катастрофални последици. Во меѓувреме, рече тој, лабораториите се префрлиле на минимум работа. – Воопшто не ни се познати причините за ваквиот неразбирлив однос кон нашата установа, дали се работи за неправилно планирање на средствата за здравство оваа година или за лоша проценка на состојбата на одговорните за финансирање на работата на примарните здравствени установи, потенцира Јеркан. Здравствениот дом, како што рече, од почетокот на епидемијата до крајот на минатата година дал 1,74 милиони лабораториски услуги, а во првите десет месеци од годинава биле извршени околу два милиони лабораториски услуги, бидејќи во ковид-амбулантите имало повеќе пациенти. – Се прашуваме дали е можно никој да не реагира на алармантната состојба во Здравствениот дом во Ниш, која брзо може да се претвори во вистинска катастрофа. Поради ваквиот однос е загрозено здравјето на граѓаните и на целата нација, рече Јеркан. Тој потсети дека Здравствениот дом во Ниш е најголемата здравствена установа во Србија, која е на ниво на Белград по бројот на прегледи од почетокот на епидемијата на Ковид, иако главниот град има шест пати повеќе жители од Ниш. Во официјалниот одговор што „Политика“ го доби од РФЗО, наведено е дека за Здравствениот дом Ниш за лабораториски и санитарни услуги се издвоени 67,2 милиони динари, а за реагенси и санитарен материјал во овој момент се потребни уште 18,6 милиони динари....

На 04.12.2021 во 21.30 часот кај наплатна рампа Смоквица, полициски службеници од Полициската станица за граничен надзор и Граничен премин „Богородица“ ги лишиле од слобода Ф.Д.(19), кој управувал патничко возило „опел вектра“, со штипски регистарски ознаки и 16-годишен совозач, двајцата државјани на Р.Србија, бидејќи при контрола во возилото биле пронајдени 9 лица мигранти. Од нив, шест биле кубански, а три индиски државјани. Поради постоење основи на сомневање за сторено кривично дело по чл.418-б од Кривичниот законик, возачот и совозачот биле приведени во полициска станица, за случајот е известен Јавен обвинител од ОЈО за гонење на организиран криминал и корупција и ќе се соочат со законски превидените поднесоци, додека лицата мигранти биле спроведени во Транзитниот центар „Винојуг“ Гевгелија за понатамошна постапка....

Мексиканската војска пресретнала два брода во близина на брегот на земјата со голема пратка кокаин во Пацификот, соопшти синоќа Министерството за морнарица. При претресот на бродовите биле пронајдени вкупно 1,6 тони кокаин. Седум мексикански државјани вмешани во шверцот на дрогата се приведени и предадени на обвинителството. Наскоро се очекуваат обвиненија. Според прелиминарните податоци, транспортот на кокаин го организирал еден од мексиканските нарко картели. На почетокот на февруари, во близина на брегот на северозападниот дел на Синалоа, војската заплени брод со повеќе од 2,5 тони метамфетамин и повеќе од 100.000 таблети фентанил. Вкупната вредност на нелегалниот товар на црниот пазар била околу 90 милиони долари....

Ноќеска (04/05.12.2021) полициски службеници на СВР Тетово спроведоа акциска контрола за управување возила под дејство на алкохол.Во контролата биле откриени и сакнционирани вкупно 29 пијани возачи (ТЕ-23 и ГВ-6). Сите возачи-прекршители веднаш се исклучени од сообраќај, изготвени им се законски предвидените поднесоци и ќе се соочат со парични глоби од 225 до 325 евра во денарска противвредност, а двајца возачи кои одбиле алкотестирање (ТЕ) со глоба од 500 евра. Покрај тоа, на сите им претстои и мерка времено одземање на возачките дозволи од 3 до 12 месеци....

Поранешниот американски претседател Доналд Трамп остро зборуваше за шефот на Комитетот на началниците на генералштабовите на американската армија Марк Мили, пренесе весникот „Експрес“. Трамп го нарече највисокиот американски генерал „проклет идиот“ поради повлекувањето на војниците од Авганистан. Тој потсети како Мили се обидел да му докаже дека при повлекувањето на американските трупи од таму ќе биде поевтино да се остави сета воена опрема во земјата отколку да се изнесе. – Имате авион од 50 милиони долари. Имате прекрасен хеликоптер од 29 милиони долари. Имавме секакви хеликоптери. Многу од нив се сосема нови, буквално само што отпакувани. Дали мислите дека е поевтино да го оставите таму за да го земат, отколку да го наполните со половина резервоар гас и да го однесете во Пакистан или да го вратите во нашата земја?, праша Трамп. Говорејќи на настан синоќа во Мар-а-Лаго организиран од конзервативната организација Turning Point Action, Трамп истакна дека тој од Авганистан би зел сè што припаѓало на САД, „од најмалата завртка“. Toj претходно рече дека Русија и Кина ги демонтирале и проучувале хеликоптерите што ги оставиле САД во Авганистан. Според него, Русија и Кина веќе имаат модели на американски хеликоптери кои наскоро ќе бидат усовршени. „Тие веќе ги демонтираат апачите, ги проучуваат и наскоро ќе ја состават најдобрата опрема“, изјави Трамп. На 15 август талибанците ја презедоа контролата на целата територија на Авганистан по повлекувањето на американските трупи од земјата. Евакуацијата на американските војници и дипломатската мисија од Авганистан официјално заврши на 31 август 2021 година....

Министерството за внатрешни работи ја информира јавноста дека и годинава спроведува превентивна кампања, со цел на граѓаните да им се укаже за можните последици од употребата на петарди и други пиротехнички средства, посебно актуелна пред и за време на новогодишните и божиќните празници. МВР презема и репресивни мерки, со цел санкционирање на употребата на петарди и други пиротехнички средства и ги потсетува граѓаните за законските одредби во кои е санкционирана употребата на пиротехнички средства и нивната нелегална продажба. Така, Законот за прекршоци против јавниот ред и мир во член 31 предвидува глоба во износ од 200 до 500 евра во денарска противвредност за оној кој неовластено пука од огнено оружје, употребува пиротехнички средства или сличен експлозивен или лесно запалив материјал, или на сличен начин го нарушува мирот и безбедноста на граѓаните. Согласно Кривичниот законик, во член 396 е предвидено недозволеното изработување, држење и тргување со оружје или распрскувачки материи, при што: (1) Тој кој што неовластено изработува, држи, продава, набавува или врши размена со огнено оружје, муниција или експлозивни материи, ќе се казни со затвор од три до десет години; (2) Ако предмет на делото од ставот 1 е поголемо количество на огнено оружје, муниција или експлозивни материи, или огнено оружје, муниција или експлозивни материи кои на граѓаните им се забранети, сторителот ќе се казни со најмалку пет години затвор....

ВМРО-ДПМНЕ предводена од Христијан Мицкоски не бележи никакви промени. Во Белиот дворец е присутна истата режимска матрица на Никола Груевски. Вистински доказ за тоа е и враќањето на висока партиска функција на кумот на Груевски и поранешен министер за финансии Зоран Ставрески. Истиот тој Ставрески во 2012 на црниот понеделник даде налог на собраниското обезбедување насилно да ги исфрли новинарите, а потоа и пратениците од собраниската сала. Тој ист Ставрески како министер за финансии ја презадолжи државата за да се финансира проектот Скопје 2014, тој е истиот Ставрески кој беше десна рака на Никола Груевски во спроведување деструктивни економски политики. Целата јавност имаше можност да слушне како Ставрески вели „Трошиме за чоколадо, а немаме ни за леб“, а денес, тој Ставрески ќе ја контролира работата и ќе им дава наредби на градоначалниците од редовите на ВМРО-ДПМНЕ. Ова, за жал, значи дека градоначалниците од редовите на ВМРО-ДПМНЕ наместо да работат за граѓаните и исклучиво во нивен интерес, ќе работат за Ставрески и неговиот личен интерес. Се појасно станува брзањето на Мицкоски да ја преземе власта. Под притисок на белагецот од Будимпешта во Белиот дворец се прават планови за негово враќање. По негова насока се враќаат неговите најблиски соработници на партиски позиции. На нашата земја не е и потребно враќање во минатото, на Република Северна Македонија потребна и е интеграција со светските демократски текови....

Во животот секогаш најмногу не инспирираат поединците кои прават нешто добро, а, без никаков надомест. Доброволно, искрено, посветено и чесно, мотивирани единствено од желбата да се помогне некому во неволја, да се понуди утеха, да им се служи на другите луѓе и на заедницата на која припаѓаат. Драги волонтери Вашата благородна мисија е ретка појава во светот во кој милиони секојдневно се во постојана трка по материјални богатства и моќ, не гледајќи дека покрај нив има многумина кои страдаат. Сите ние, имаме многу што да научиме од вас, вклучително и во прв ред, ние, политичарите. Ви благодарам за сето време што го одвојувате и за сите напори што ги вложувате за да помагате и придонесувате за општото добро и за поспокоен живот на сите немоќни, болни и унесреќени Дозволете ми, во името на сите наши граѓани да искажам огромна благодарност и почит за вашата пожртвуваност, вашата одговорност и посветеност. Ве охрабрувам и натаму да останете ангажирани, да делувате онаму каде што е најпотребно, и со личен пример полека да ја враќате вербата во хуманоста и солидарноста како предуслови за една среќна и просперитетна човечка заедница....

Во недостиг на ефикасни мерки за справување со економската и енергетската криза, од центарот за комуникации на СДСМ излегуваат банални соопштенија. Центарот за комуникации на СДСМ најмалку треба да пишува за режим, бидејќи во СДСМ на големо владее. Очигледно е дека нивниот претседател Заев со СДСМ се однесува како да е нејзин сопственик. Нивниот претседател Заев воспостави режим во СДСМ, па назначува наследник - управител, како Ковачевски, кој треба да го одржува во живот заевизмот. ВМРО-ДПМНЕ нема да го коментира заевизмот во СДСМ. Единствено најважно е со заминувањето на Заев да замине и заевизмот од власта, затоа што тој е сидрото кој не и дозволува на Македонија да оди напред. Заевизмот е најголема закана за граѓаните и Македонија. Пиуните кои треба да го продолжат заевизмот треба да си заминат заедно со Зоран Заев. Тоа единствено може да се случи само преку брзи предвремени парламентарни избори....

Во текот на вчерашниот ден (04.12.2021) Мобилната единица за безбедност на сообраќајот на патиштата спроведе зајакната акциска контрола на автопатот Куманово - Скопје - Велес за санкционирање на возила кои се движат со брзина поголема од дозволената, при што санкционирани се 85 возачи. Од нив, 13 возила се движеле со брзина над 50 километри на час повеќе од дозволеното, а едно возило се движело со дури над 70 километри на час повеќе од дозволената брзина. Засилените акциски контроли продолжуваат и во наредните денови....

Данската премиерка Мете Фредериксен се извини откако беше снимена без маска во продавница, спротивно на новите анти-ковид правила. Видеото што го објави вчера данскиот дневен весник „Екстра Бладет“ е снимено во петокот од случаен минувач низ излог во центарот на Копенхаген, четири дена по повторното воведување на обврската за носење маски на јавни места и во јавниот превоз. – Се работи за превид, откако стапија во сила новите правила. Тоа го сфатив кога ме сними граѓанин, реагираше Фредериксен на социјалните мрежи. – Знам дека тоа може да му се случи на секого. Жал ми е и сакам уште еднаш да ви се заблагодарам за сè што правиме заедно за да ја спречиме епидемијата, рече таа....

Министерството за внатрешни работи во текот на вчерашниот ден (04.12.2021) продолжи со засилените акциски контроли во областа на сообраќајот. На територијата на град Скопје изречени се вкупно 144 мерки, меѓу кои за возење повеќе од дозволената брзина 39 санкции, 19 мерки за возење под дејство на алкохол, 16 санкции за возење без возачка дозвола, седум за возач почетник, четири прекршоци што ги чинат возачите на мотоцикли. Засилените акциски контроли продолжуваат и во наредните денови....

Турските разузнавачки служби вчера спречиле обид за напад врз претседателот Реџеп Таип Ердоган, јавија некои турски медиуми. Според извештаите, експлозивна направа е пронајдена под полициско возило кое обезбедувало митинг за поддршка на Ердоган во југоисточниот град Сирт. Бомбата, која била пронајдена само неколку минути пред почетокот на митингот, брзо била деактивирана. Во тек е истрага за инцидентот....

Земјотрес со јачина од 6,2 степени според Рихтеровата скала утрово ја погоди Индонезија, а локалните власти соопштија дека нема жртви или материјална штета. Нема опасност од цунами, соопшти шефот на индонезиската агенција за земјотреси и цунами. Земјотресот се случил во 6:47 часот по локално време, на длабочина од 157 километри, во централната провинција Северен Сулавеси....

Градоначалникот Тони Коњановски во обраќањето на свеченоста ја нагласи петдецениската поврзаност на Битола и Епинал, потенцирајќи дека во идниот период, истата треба постојано да се развива и надградува. Делегација од Општина Битола, предводена од градоначалникот Тони Коњановски, го посети збратимениот град Епинал во Република Франција, каде присуствуваше на официјалната прослава по повод патрониот празник на градот – Свети Никола, заштитникот на градот и на регионот Лорен, јави дописникот на МИА. Целта на посетата е зајакнување на воспоставената соработка и отворање нови можности за заеднички напредок, во рамки на едно од најдолгите збратимувања, точно 53 години, на Епинал и Битола. Градоначалникот Тони Коњановски во обраќањето на свеченоста ја нагласи петдецениската поврзаност на Битола и Епинал, потенцирајќи дека во идниот период, истата треба постојано да се развива и надградува. – Нашите два града ги врзува повеќе од пет децении пријателство кое со сите свои подеми и падови, и покрај илјадниците километри што не разделуваат, сепак трае и се одржува низ времето. Во Битола, град со франкофонска и франкофилска традиција, посебно сме горди што може да се пофалиме со најдолгото збратимување во нашата земја. Од неговите почетоци, тоа се 53 години средби, посети, соработки во најразлични домени, проекти, тоа се бројни генерации кои од едната и другата страна престојувале во Епинал, во Битола, заеднички размислувале, се договарале, планирале, се дружеле, рече Коњановски. Суштината на средбите од овој вид, нагласи тој, е можност да разговараме за перспективите во соработката, за идни проекти. – Да продолжиме да работиме, да делуваме, да соработуваме, да бидеме солидарни, да се развиваме, менуваме и обновуваме, за да станеме подобри, индивидуално, колективно, рече градоначалникот Коњановски во своето обраќање. За градоначалникот на Епинал Патрик Нардин, збратимувањата се многу значајни. – Тие дозволуваат запознавање со културите на другите, запознавање со другите земји, бидејќи благодарејќи на овие збратимувања ние ќе можеме да ја изградиме вистинската Европа. Европа во која ги споделуваме истите вредности: демократијата, взаемното почитување на нашите различности, оваа света Унија што ќе ни дозволи да го зачуваме мирот во Европа. рече тој. Светската здравствена криза ги попречи директните размени на збратимените градови и всушност ова е прва меѓусебна директна размена меѓу претставниците на двата градови. Ова е дотолку позначајно бидејќи двата збратимени градови се стекнаа со нови совети и градоначалници, кои се договорија интензивирање на соработката и размената на сите полиња и пред се во размената и пренесувањата на искуствата за урбаното и комуналното уредување, енергетската транзиција и самостојност, мобилноста и движењето на граѓаните без да се заборави на културната и спортската размена. Во делегацијата на Општина Битола, која го посети збратимениот град Епинал, покрај градоначалникот Тони Коњановски се и секретарот на општината, Борче Димитровски и советниците од Советот на Општина Битола, Жаклина Наумовска и Бојан Бојкоски. Збратимување е родено на крајот од Првата светска војна, на сите ние е познато дека во Битола почиваат тринаесет илјади француски војници. Воспоставувањето на односите беше поттикнато од поранешниот борец на Источниот фронт, Пол Руа и градоначалникот на Епинал Андре Арган, чиј татко почива во Битола....

Индиските безбедносни сили по грешка убиле неколку цивили во село во северозападната држава Нагаланд, информираа владини претставници. Индискиот министер за внатрешни работи Амит Шах изјави дека е „многу вознемирен“ од веста дека во инцидентот во саботата доцна навечер загинале цивили, без да прецизира за колку жртви станува збор. Локалните медиуми јавија дека индиските безбедносни сили по грешка отвориле оган врз цивили, без да наведат причина за инцидентот. – Државата детално ќе го истражи овој инцидент, ужалените семејства мора да ја добијат правдата, напиша Шах на Твитер. Неименуван припадник на армијата рекол дека војниците пукале во камион, откако добиле информација дека во таа област се движат бунтовници и оти прво биле убиени шест лица. Насобраните селани потоа запалиле две воени возила, а војниците пукале во нив и убиле уште седум лица, рекол воен претставник кој побарал да остане анонимен....

По само еден месец, откако завршија локалните избори, граѓаните можат да ги видат промените и новиот пристап на работа од страна на градоначалниците на ВМРО-ДПМНЕ. Започнаа со реализација на голем дел од ветените над 14 илјади проекти во програмите за локалните избори. Граѓаните се сведоци на секојдневните активности на градоначалниците се со цел подобрување на условите за живот. За само еден месец се започна со изградба и реконструкција на десетици улици и булевари, водоводни и канализациони мрежи, како и други капитални проекти кои се од голема важност за граѓаните. Грижата за животната средина и намалувањето на загадувањето е еден од приоритетите за ВМРО-ДПМНЕ. Во секоја општина се чистат големите депонии, се посадуваат голем број на садници и се зголемува шумскиот фонд, додека општина Аеродром започна со монтирање на фотоволтаици во основните училишта и дел од градинките. Долгогодишниот проблем со кои се соочуваа граѓаните, легализација на нивните домови, започна системски да се решава. Доделени се илјадници нови решенија за легализација во повеќето општини, како Кисела Вода, Гази Баба, Аеродром, Велес, Штип. Во општина Битола при крај е изградба на трибината на фудбалскиот стадион „Под Тумбе кафе“, во општина Илинден во завршна фаза е новото основно училиште, додека во општина Аеродром се пушти во употреба целосно реконструиран спортски центар. Градоначалниците на ВМРО-ДПМНЕ се во секојдневна комуникација со граѓаните, преку отворените денови во општините, како и преку средби во месните и урбаните заедници. Народот ја даде довербата на последните локални избори за проекти и промени. Преку глава им е на граѓаните од лажни ветувања, неработење, криминал и корупција од Зоран Заев и СДСМ....

Професорот Марјан Гушев од Факултетот за информатички науки и компјутерско инженерство (ФИНКИ) има 115 научни статии индексирани во глобалната интернетска научна база на податоци Web of Science во изминатата деценија (2011-2020), што е најголем број меѓу професорите на Универзитетот „Св. Кирил и Методиј“-Скопје. УКИМ му додели плакета за посебен придонес во развојот на научно-истражувачката дејност на Универзитетот и негова афирмација во земјата и странство, што е и прво вакво признание. Според Гушев, овој успех за сите научници истражувачи значи престиж дека се потврдуваат применетите научни методи. – Се чувствувате дека добиените резултати стануваат дел од ризницата на најголеми достигнувања во научната јавност, рече Гушев во интервју за МИА. Неговите публикации во светската научна база се од областа на компјутерските науки и нивната примена. Во фокусот на неговите истражувања е ИТ-технологијата во медицината. Тој има патентирано системи за мониторирање на работата на срцето и способноста да се регулира гликозата во крвта врз основа на ЕКГ мерења, користејќи мали носечки неинвазивни уреди кои се налепуваат на телото, како и принципи на пресметување во облак и уреди кои се наоѓаат на работ на Интернет (edge computing). Основач е на компанијата „Иновејшн“ (Innovation) која развива медицински софтвер за оддалечено набљудување на срцеви аритмии, а од 2020-та успешно го пласира овој продукт на светските пазари. Иако условите за истражувања во странство се значително подобри, овој македонски научник и иноватор вели го избрал потешкиот пат за својата научна кариера, со цврсто уверување дека со посветена и напорна работа резултати може да се постигнат и во сопствената држава. -Посакувам релевантните институции да преземат мерки за поорганизиран развој, финансирање на науката, и да помогнат сите потенцијални научници да добијат подобри можности за истражување и развој, порачува во интервјуто Гушев, кој покрај истражувачка работа има и тридецениска наставна активност. Проф. Гушев, го добивте нововостановеното признание од УКИМ за најголем број научни публикации индексирани во базата на Web of Science во изминатата деценија (2011-2020) меѓу сите професори на Скопскиот универзитет. Колкав е нивниот број и од која област се? – Универзитетот „Св. Кирил и Методиј“ во Скопје за своите вработени спроведе анализа на податоци во базата Web of Science, позната како база на списанија со фактор на влијание што ги индексира највлијателните научни статии во основната колекција Core Selection, вклучувајќи индекси за списанијата со фактор на влијание Science Citation Index Expanded (CSIE), за проширената база на списанија што се пробиваат Emerging Science Citation Index (ESCI), и за базата на зборници од конференции со фактор на влијание Conference Proceedings Citation Index (CPCI). Според оваа анализа, во периодот од 2011-2020, како дел од УКИМ, јас имам публикувано 115 статии, а потоа следуваат Сашко Ристов (кој докторираше под мое менторство, а сега работи на универзитетот во Инсбрук, Австрија) со 84, и колегата Трајче Стафилов од ПМФ со 82 статии. Публикациите се од областа на компјутерските науки и нивната примена. Интересно е да се напомене дека оваа висока бројка според Web of Science значи просечно еден труд со фактор на влијание месечно. Инаку, секој автор од УКИМ објавил просечно 2,871 статии во разгледуваниот период од 10 години. Колку од Вашите трудови се со фактор на влијание и што значи тоа за перспективата на самиот научник-истражувач, а што значи и за нашата наука, па и за државата? – Покрај публикуваните 115 статии кои се индексирани во основната колекција на Web of Science во разгледуваниот период од 2011-2020, јас имам презентирано на конференции од локален карактер, и публикувано уште статии во списанија кои сѐ уште не достигнале доволен број на цитати за да бидат вклучени во базата Web of Science. Многу од нив се наоѓаат во базата Scopus, која се одржува од Elsevier со седиште во Холандија, или се индексираат според Scholar.Google, за разлика од Web of Science, која се одржува од Clarivate со седиште во Америка и канцеларии на сите континенти. Објавувањето во списанија и зборници од конференции со фактор на влијание значи дека презентираните научни резултати се квалификуваат од еминентни рецензенти од областа. Ова за сите научници истражувачи значи престиж дека се потврдуваат применетите научни методи, односно се чувствувате дека добиените резултати стануваат дел од ризницата на најголеми достигнувања во научната јавност. Бројот на објавени статии со фактор на влијание и бројот на цитати од други автори се основни параметри според кои се оценуваат универзитетите и државите воопшто, односно се мерило за квалитетот и квантитетот на резултатите од научно-истражувачката работа. Два Ваши труда, од 2017 и 2018 година, достигнале висока цитираност, од 50 и 37 цитати според Web of Science. На која област се однесуваат и на што конкретно се должи високиот ранг т.е. 98-ми персентил од сите можни статии? – Практично значи дека овие две статии според бројот на цитати достигаат во најдобрите 2 отсто од сите статии во разгледуваната година. За да не дојде до забуна, истакнувам дека една статија добива цитати во подолг период, односно колку што повеќе поминува времето, толку повеќе е веројатно дека објавената статија ќе има повеќе цитати, а од друга страна, индексирањето се спроведува во рамки на научните области за кои се однесува статијата. Конкретно, првата статија се однесува на објавување нова рамка за податочна аналитика користејќи платформа за пресметување во облак без грижа за серверите (serverless) применлива за уреди кои се наоѓаат на работ на Интернет (edge computing), а втората ја прикажува еволуцијата на овој тип на пресметување од аспект на Интернет од Нештата (Internet of Things). Истражувате за употреба на ИТ-технологијата во медицината, биоинженеринг, телемедицина… Имате патентирано три пронајдоци во Светската организација за интелектуална сопственост. За какви патенти се работи? – Патентирани се системи за мониторирање на работата на срцето и способноста да се регулира гликозата во крвта врз основа на ЕКГ мерења, користејќи мали носечки неинвазивни уреди кои се налепуваат на телото, како и принципи на пресметување во облак и уреди кои се наоѓаат на работ на Интернет (edge computing). Овие системи имаат практична примена за воспоставување на „набљудување од типот на интензивна нега“ за пациентот додека е дома или во нормални работни услови, односно не се однесува на хоспитализирани пациенти, туку се воспоставува систем кој овозможува оддалечено континуирано набљудување и алармирање во случај на опасни здравствени ситуации. Основач сте и на „Иновејшн“ која развива медицински софтвер, телемониторинг, алгоритми за вештачка интелигенција. Има ли производи/решенија на компанијата кои веќе широко се применуваат? – Патентите означуваат идеја како да се реализира некој систем, но тоа не значи дека имате доказ за концептот, реализиран систем, сертификат од релевантно тело дека се исполнуваат технички перформанси и дека се преземени сите мерки за заштита, доказ дека системот работи во лабораторија и во средина каде ќе се применува, и потврден систем за управување и производство на уредот. Потоа, треба да започне комерцијализацијата на продуктот, со доказ за продажба, формирање дистрибутивен ланец, брендирање, маркетинг итн., односно потребна е компанија којашто тоа ќе го обезбеди и гарантира. За реализација на ваков тип активности, надвор од Универзитетот се формираат спиноф стартап компании, како што беше и случај во 2006 година кога се формираше компанијата „Иновејшн“. Главна цел на компанијата од 2015 година наваму е да развива медицински софтвер за оддалечено набљудување на срцеви аритмии, а од 2020-та успешно го пласира овој продукт на светските пазари. Потребен е подолг период за да се пробие иновација од ваков тип, затоа што таа предвидува комплетно нови методи и начин на медицински мониторинг надвор од досегашната практика. Она што лесно се пробива се нови уреди кои се помали и подобри од постојните и лесно може да ги заменат. Но, кога станува збор за уреди кои воведуваат нов метод, тогаш треба повеќе време додека не стане дел од медицинската практика. Намената на нашиот продукт е да им се помогне на докторите во утврдувањето на правилна дијагноза врз основа на огромен број на податоци, иако има варијанти уредот да се користи и само од крајните корисници (пациенти или сите засегнати), нешто слично како рачен апарат за мерење притисок и одредување кои нивоа се во нормален ранг. Но, за разлика од едноставна споредба со гранични нивоа, срцевата активност е многу покомплексен витален параметар и од огромниот број на податоци треба да се одредат можните аритмии и нивото на опасност по здравјето, до кои тие можат да доведат. Во 2012 година ја добивте наградата „Научник на годината“ на УКИМ, а оваа година ја примивте и првата награда кај нас за најбројни трудови во Web of Science. Притоа рековте дека заслугите за напорната работа на крајот се вреднуваат. Колку еден научник, според Вас, може да се посвети максимално на својата цел кога тоа не зависи само од неговиот напорен труд, туку и од фактори што не зависат од него, како услови, опрема, финансии….? – Претпочитам дека секој што се определил за академска кариера или научно-истражувачка работа сака да биде вреднуван за достигања во науката. Мора да се разбере дека истражувањето не се прави за да биде вреднувано, односно потенцирам дека, сепак, секој што работи напорно и макотрпно се посветува на истражувањето ќе биде вреднуван на одреден начин. Во 2012 година ја добив награда за научник на годината на УКИМ, и тоа за мене претставуваше уште поголем поттик да продолжам понатаму. Се надевам дека оваа награда ќе биде мотив и за другите. За фундаментални (теориски) истражувања не се потребни преголеми средства, освен оние кои ви овозможуваат да ги посетите најголемите конференции од областа и да размените мислења и идеи со други научници на темата на која работите. Но, за применетите истражувања, покрај наведеното, потребни се многу повеќе средства за проекти кои најчесто се добиваат од соодветни истражувачко-инвестициски програми (H2020, Horizon и слично), Дополнително, учесниците во проектот треба да партиципираат со 5 до 30 проценти од вкупната вредност на проектот кој би се водел, односно ако немате сопствени средства за финансирање, немате ни проект. Фондот за иновации и технолошки развој на Македонија ми додели два проекта во 2015-та и 2018-та, а без нив резултатите кои ги постигнав не ќе беа можни со тој обем за толку мал период. Имате и 30-годишна наставна активност, професор сте на ФИНКИ каде што студира потенцијалот на науката на иднината, генерацијата на Индустријата 4.0. Дали младите научници имаат простор да се реализираат овде или почесто се решаваат за кариера надвор од државата? – Условите во странство се значително подобри, посебно ако се анализира колку средства државата доделува за наука и истражување, и затоа сите оние кои престојуваат во странство имаат многу поголеми можности и перспективи. Јас, сепак, го одбрав потешкиот пат за мојата научна кариера, со цврсто уверување дека резултати може да се постигнат и во сопствената држава, сметајќи дека не е толку важно каде се наоѓаш, туку е важно колку посветено и напорно работиш. Во текот на минатите години, во повеќе наврати се потврди ова мое убедување дека и ние, од оваа средина, можеме да постигнеме големи резултати во науката, иако реално имаме значително помали можности од развиените центри. Посакувам релевантните институции да преземат мерки за поорганизиран развој (финансирање) на науката, и да помогнат сите потенцијални научници да добијат подобри можности за истражување и развој, на пример, помош да се формираат добри предлог-проекти и учество во поголеми меѓународни проекти, партиципација во реализацијата на проектите, плаќање на средства за објавување статии во списанија со златен пристап (да се подмират сите трошоци за публикување, така што статиите се бесплатни за сите) или подмирување на трошоците за регистрација и учество на врвни научни и стручни конференции. Инаку, во развиените земји се води грижа не само за подмирување на директните материјални трошоци за истражување и развој, туку и за обезбедување плати за истражувачите во рамки на научни институти, не само за областите кои се од национален карактер. Вложувањето во ваков тип институти е одржлива инвестиција, затоа што ќе се сопре изливот на мозоци, а воедно формираните научни институти по една или две години ќе се оспособат сами да обезбедат финансии за реализација на проекти....

Пуштањето на АД ТЕЦ Неготино во процес на производство ќе ја чини државата помалку отколку увоз на електрична енергија, оценува во интервју, генералниот директор Небојша Стојановиќ. Проценките се дека со моментната цена на мазутот од 36 ден/кг, производната цена на АД ТЕЦ Неготино ќе изнесува од 150 – 175 евра / мегават-час, во зависност од тоа дали ќе работи со еден или два котла. Владата на Република Северна Македонија даде согласност да се склучи договор за деловно-техничка соработка меѓу АД ЕСМ и АД ТЕЦ Неготино за набавка на мазут и производство на електрична енергија во периодот декември 2021 – април 2022 со можност за понатамошна соработка, доколку за тоа има потреба. Во времиња на закани од енергетска криза поради дефицит од струја, низ годините се знаело да се каже дека само „златната резерва” ТЕЦ „Неготино” може да ја спаси земјава од мрак. Изградена пред 43 години, таа има инсталирана моќност од 210 мегавати и е втор по големина енергетски капацитет во државата. Тоа е единствена електрана што како погонско гориво користи мазут и брзо може да се преориентира и на природен гас. Како се оценува подготвеноста на вработените и опремата за почнување со работа на Термоелектраната ,,Неготино”? – ТЕЦ Неготино последен пат бил вклучен во процесот за производство на електрична енергија во 2009 година. Редовно во текот на овие изминати 12 години се врши проверка на опремата за работа и обуки на вработените. Низ процесите на конзервација на опремата што се врши секоја година се обезбедува заштита на истата. Сметам дека во овој момент и опремата и вработените се подготвени за започнување со работа, но важно е да се спомене дека целокупниот процес на „рестартирање на ТЕЦ Неготино“ ќе подлежи на пробен период и проверка на сите функционалности на опремата. Колку ќе ја чини ова работење на ТЕЦ ,,Неготино” државната каса? – Цената на електричната енергија на берзите секојдневно расте. Во моментот изнесува 283 евра/ мегават-час. Во секој случај пуштањето на АД ТЕЦ Неготино во процес на производство ќе ја чини државата помалку отколку увоз на електрична енергија. Проценките се дека со моменталната цена на мазутот која изнесува 36 ден/кг, производната цена на АД ТЕЦ Неготино ќе изнесува од 150 – 175 евра / мегават-час, во зависност од тоа дали ќе работи со еден или два котла. Владата на Република Северна Македонија даде согласност да се склучи договор за деловно-техничка соработка меѓу АД ЕСМ и АД ТЕЦ Неготино за набавка на мазут и производство на електрична енергија во периодот декември 2021 – април 2022 со можност за понатамошна соработка, доколку за тоа има потреба. Мазутот ќе го набави АД ЕСМ, а за тоа ќе добие и помош од Владата, и ќе ја преземе целокупната произведена електрична енергија од АД ТЕЦ Неготино. Обртните средства од прозиводството на електричната енергија во првиот месец, ќе бидат искористени од страна на АД ЕСМ за набавка на мазут за понатамошно производство. Колку може овој капацитет да придонесе за помош при енергетска криза? – Ставањето во функција на АД ТЕЦ Неготино, во моменти на глобална енергетска криза, ќе даде економски придонес за државните енергетски компании и целокупното стопанство. Се добива зајакнување на домашниот електро-енергетски систем, се зголемува домашното производство а со тоа добиваме и зголемување на БДП-то. Произведената електрична енергија во ТЕЦ Неготино, АД „ЕСМ“ ќе ја искористи во еден дел за потребите за снабдување на домаќинствата и малите потрошувачи во случаи на кусоци, дел ќе понуди за потребите на АД „МЕПСО“, додека вишокот електрична енергија, ЕСМ Продажба ќе ја понуди на продажба на слободен пазар на домашните стопански субјекти, по цени пониски од цените на берзата. Со постигнување прифатлив договор за снабдување големи количества мазут и со долгорочно ангажирање на неготинскиот капацитет, може да се постигне конкурентна цена на произведен киловат-час во споредба со увозот на струја или во споредба со струјата од планираната нова гасна електрана со комбиниран циклус наместо сегашната, сметаа експерти пред повеќе години. Кој е ставот во врска со ова размислување? – Токму тоа и се случува во моментот. Со давањето согласност од страна на Владата на Република Северна Македонија за набавка на мазут и производство на електирчна енергија, во овој момент се постигнува поевтина електрична енергија од цената на електричната енергија на берзите. Експерти низ годините велеа дека неготинската електрана може да се збогати со два гасни агрегата и така да се растовари РЕК „Битола”. Беше кажано дека две, со моќност од вкупно 680 мегавати, би можеле да се сместат во оранжерии и за топлифицирање на Кавадарци и на Неготино. Кога би можело да се очекува гасификација на ТЕЦ ,,Неготино”? – За ТЕЦ Неготино, изработена е физибилити студијата за јавно-приватно партнерство и по внатрешните разговори во владата одлучено е TЕЦ Неготино да се припои кон АД ЕСМ и да функционира во иднина како дел од АД ЕСМ. АД ЕСМ треба да ги започне сите активности за гасифицирање на ТЕЦ Неготино во најбрз можен рок. Но, овој момент сите сме насочени исклучиво во борба и справување со состојбата за енергетска криза, како што е користење на целиот државен енергетски капацитет. Знаете дека е прогласена кризна состојба во енергетиката, така што врвен приоритет е добивање доволни количини на електрична енергија за домаќинствата и стопанството и избегнување на ценовни шокови. Не би можел во овој момент да знаеме или прогнозираме кога точно би се гасифицирала ТЕЦ Неготино. ТЕЦ „Неготино“ може да биде енергетска база во државава што ќе ја направи да биде независна од увоз на струја, беше речено на 30-годишнината од изградбата на неготинската термоелектрана. Дали сеуште се смета дека таа може да биде енергетска база во државата? – Се уште држи таа теза, бидејќи еве се покажува дека во вакви кризни, лоши времиња на енергетскиот систем во државата, ТЕЦ Неготино може да придонесе во подобрување н а состојбите. Беше најавена приватизација на ТЕЦ „Неготино”. Како би се одразила евентуалната продажба на „златната резерва”, врз македонскиот електроенергетски систем ? Одговор дадов на ова прашање во едно од претходните прашања. Меѓутоа повторно ќе истакнам дека во овој момент врвен приоритет е справувањето со енергетската криза која е глобална, неминовно е и засегнатоста на нашата држава. За сите други опции и планирања мислам дека може да оставиме време за коментирање....

Владата ги замрзна цените откако се поскапи, инфлацијата го јаде стандардот. Одлуката за замрзнување на цените е задоцнета. Замрзнувањето на цените требаше да се случи пред да поскапат производите во малопродажба. Дополнително власта не решава ништо, затоа што граѓаните ги очекува поскапување на цената на струјата. Според неофицијални информации АД ЕЛЕМ бара покачување од над 20%, а можно е уште поголемо покачување и како барање на МЕПСО. Само за еден месец заради недостатокот на струја се потрошија скоро 40 милиони евра, а трендот на трошење земајќи ја во предвид актуелната ситуација со енергетските капацитети ќе продолжи. Нема ниту јаглен, хидро акумулациите се празни, а ТЕЦ Неготино не е ниту на повидок дека ќе почне со работа. Со оваа влада нема изглед за излез од економската и енергетската криза....

Најмалку 13 лица загинаа во ерупцијата на вулканот Семеру на индонезискиот остров Јава, додека десет лица кои биле заробени се успешно евакуирани, соопшти државната агенција за вонредни состојби (БНПБ). Семеру вчера исфрли големи количества гас, пареа и пепел, кои ги зафатија околните села во провинцијата Источна Јава и ги принудија луѓето панично да бегаат. Претставникот на БНПБ, Абдул Мухари соопшти дека загинале 13 лица од кои само двајца досега се идентификувани. Повредени се 98 лица, меѓу кои и две трудници, додека вкупно 902 се евакуирани. БНПБ додаде дека најмалку 35 лица се хоспитализирани, а заменик-претседателот на областа Лумајанг рече дека 41 лице се здобиле со изгореници....

Премиерот Зоран Заев и лидерот на Алтернатива Африм Гаши денеска во Клубот на пратениците ќе ја потпишат програмата за заедничко дејствување и приклучување на партијата во Владата и парламентарното мнозинство. Се очекува Заев и Гаши да кажат и кои ресори ќе ги преземе Алтернатива. Одлуката за влегување на Алтернатива во владината коалиција беше донесена синоќа во Тетово на седница на Цантралниот совет, највисокото тело на партијата. Партискиот лидер Африм Гаши на седницата информирал за текот на досегашните преговори со Заев и програмските точки кои се договорени, како и за преземените обврски. Причина за влегување на Алтернатива во Владата, како што наведе партискиот портпарол Орхан Муртезани, е историскиот момент за отворање на преговорите за членство во ЕУ и затворање на спорот со Бугарија како цели на државата, но и на Албанците затоа што со тоа ќе се отвори патот за евроинтеграција на целиот регион. Договорено е Владата да побара меѓународна истрага за случаите каде, според Алтернатива, има сомнежи за политичка импликација како што се Монструм, Алфа, Диво насеље, Алмир Алиу итн. Договорени се и точки кои се однесуваат на рамномерниот регионален развој, економски развој на Липковско, заштита на семејството како јадро на општеството, но и заштита на цената на струјата. Со влегувањето во Владата, посочи Муртезани, Алтернатива докажа дека е клучот за решавање на кризата, а не само декор со четворица пратениците, и таа ќе преземе важни одговорности. – Ќе преземеме значајни обврски од областа на здравството, борбата против криминалот и корупцијата, енергетиката, организацијата на дијаспората, но и образованието, културата и подигнувањето на квалитетот на животот на граѓаните, поддршка на економскиот живот на сите граѓани на државата, кажа Муртезани. За соработката со досегашниот коалициски партнер Алијанса за Албанците, истакна дека не е донесена одлука за нејзино прекинување и оти не е исклучена можноста таа да продолжи и во иднина. На состанокот на Централниот совет на Алтернатива му претходеа три средби на Гаши со премиерот и претседател на СДСМ во оставка Зоран Заев на кои се дискутираше за учество на Алтернатива во Владата и поддршка на парламентарното мнозинство од нивните четворица пратеници. По последната средба што се одржа во средата, од Владата соопштија дека се очекува до крајот на оваа недела да се остварат потребните консултации во СДСМ и Алтернатива и да се обезбеди потребното усогласување со цел постигнување договор за можна заедничка влада. Разговорите за ново парламентарно мнозинство и за влез на Алтернатива во владината коалиција уследија по неуспешната иницијатива во Собранието од страна на опозицијата за гласање доверба на Владата и повлекувањето на Беса од владиниот кабинет. И Алтернатива беше дел од опозицискиот блок потпишан за гласање недоверба на Владата, но Централното претседателство на партијата минатиот петок го овласти Гаши да почне разговори со сите политички актери, со премиерот и со евентуалниот нов мандатар за да се види каков е нивниот концепт за излез од политичката криза. На седница на Централниот одбор на СДСМ, што се одржа истиот ден, беше констатирана оставката на Заев од лидерската позиција во партијата што ја даде лошите изборни резултати на локалните избори, но му беше даден легитимитет да ги води преговорите за парламентарно мнозинство. СДСМ ќе избира нов лидер на конгрес на 12-ти месецов, а за истиот ден конгрес претходно закажа и опозициската ВМРО-ДПМНЕ. Заев во изјава пред една недела за тоа дали во овој момент ќе се повлече од премиерската функција а оставката ќе ја депонира во Собранието или пак ќе го послуша барањето на неговиот коалициски партнер ДУИ својот мандат да го заврши до 2024 година посочи дека сè ќе зависи од преговорите со Алтернатива и со Бугарија....

Тест на противвоздушната одбрана во регионот Натанц в о централен Иран ја предизвика вчерашната експлозија што се слушна на дваесетина километри од нуклеарниот комплекс Чахид Ахмади-Рочан, соопштија воени претставници. – Беше тестиран еден од регионалните ракетни системи за да се процени подготвеноста на теренот и нема причина за страв, изјави командантот на противвоздушната одбрана од регионот Натанц на државната телевизија....

Регионална конференција „Обновен наратив за забрзана интеграција во ЕУ“ ќе се одржи денска во Скопје во организација на Алијансата на либерали и демократи за Европа – АЛДЕ и Либерлано демократската партија – ЛДП: Конференцијата ќе ја отворат министерот за локална самоуправа и лидер на ЛДП Горан Милевски и Здравко Почивалшек, вицепремиер и министер за економски развој и технологија на Словенија. Според најавата од прес-службата на ЛДП, ќе се одржат две панел дискусии – „Иднината на ЕУ: Во кој правец се движи Европа во 2021“ и „Членство на Македонија и Западен Балкан во ЕУ: како и кога?“ на кои е предвидено да говорат вицепремиерот за европски прашања Никола Димитров и пратеничката Моника Зајкова, како и други политичари од регионот и ЕУ....

Буџетот што го предлагаме покрај конкретноста изразена во бројки, е и приказ на нашите залагања за дефинираните цели и принципи по кои ќе се водиме. Секој вложен денар на граѓаните мора да биде оправдано вложен таму каде што дава најголем ефект. Тоа е буџет со поголема „вредност на вложените пари“, и за тоа ќе има отчетност, а за таа цел се воведуваат петгодишни индикатори за мерење на успешноста на политиките. Исто така, овој буџет е кроен според „златното правило“ во јавните финансии, односно буџетскиот дефицит е помал од капиталните расходи, што значи задолжување исклучиво за капитални расходи кои достигнуваат највисоко ниво од кој било претходен буџет. Тоа ќе поттикне инвестициски циклус што ќе придонесе за забрзан економски раст, додека преку зелената агенда, поддршката на иновациите и дигитализацијата до одржлив развој и подобар квалитет на живот за граѓаните. Ова го истакнува министерот за финансии Фатмир Бесими во колумна, во која вели дека е време за развоен буџет кој ќе резултира во забрзан раст преку зголемени инвестици, но и ќе има капацитет за ублажување на кризите и ризиците со кои се соочуваме. – Овој буџет се донесува во еден деликатен момент за нашата и глобалната економија. Подложени сме на континуирана неизвесност, предизвици, но и нови можности, вели министерот и додава дека Буџетот за 2022 е конципиран да ги адресира сите можности и предизвици кои ни претстојат во следниот период. Клучни приоритети за наредната година пресликани во овој документ се натамошно економско заздравување и забрзување на растот преку инвестиции, заштита на здравјето на граѓаните во се уште присутни ризици од пандемијата, но и поддршка на животниот стандард на населението. Инвестициите добиваат значително внимание во буџетот во 2022 година. Тие со Дополнетиот предлог-буџет за 2022 одина, што вчера беше усвоен од Владата се проектирани на историски највисоко ниво досега од 38,2 милијарди денари, додека пак вредноста на прифатените амандмани е 382 милиони денари. -Во 2022 година капиталните расходи се планирани на досегашно највисокото ниво од 38,2 милијарди денари. Овој буџет претставува значајна промена и од аспект на структурата. Капиталните расходи учествуваат со 14% во вкупните расходи и се зголемени за 28,3% во споредба со 2021 година, при истовремено кратење на „непродуктивните„ буџетски трошења. Ова е во рамки на Планот за забрзан раст 2022-2026, кој има за цел финансирање на закрепнувањето на економијата погодена од кризата и поддршка на забрзан и одржлив раст притоа одржувајќи фискална стабилност, вели министерот за финансии. Со овој буџет, посочува, се почитува „златното правило“ во финансиите. Тоа значи дека, капиталните расходи го надминуваат буџетскиот дефицит, односно целокупното задолжување ќе биде искористено во капитални расходи. – Имено, познато е дека долгорочното задолжување е оправдано и праведно, ако бенефитите од вложувањата се уживаат и од генерациите кои што ќе платат за соодветните долгови. Алтернативен пристап на ова би било повисокото оданочување што би ги обесправело сегашните генерации. Затоа, задолжувањето за проекти и капитални расходи чии придобивки се уживаат од повеќе генерации, е оправдано од аспект на интергенерациската праведност и е додадена вредност на начинот на планирање и водење јавни финансии. наведува Бесими. Дополнетиот предлог буџет со вградените 23 амандмани е доставен до Собранието, каде на пленарна седница треба да биде усвоен. По Дополнетиот предлог буџет согласно Деловникот на Собранието расправата трае пет дена....

По повод Меѓународниот ден на волонтерите – 5 декември, Волонтерскиот центар на Скопје во соработка со Општина Кисела Вода и еко-движењето „За почиста Македонија“ ќе ги отворат вратите од Домот на култура во населбата Кисела Вода, каде од 11 до 15 часот сите граѓани ќе можат да донираат облека за деца и за возрасни и храна со подолг рок. Граѓаните ќе можат да слушнат за придобивките од волонтирањето, неговата важност, а младите да се запознаат со програмата „Ерасмус+“ и со можностите што Волонтерски Центар Скопје ги нуди за нивен личен развој што придонесува за јакнење на општеството во целина. Од Волонтерскиот центар информираат дека ќе биде спроведена и акција за чистење на реонот Расадник, кое важи за едно од најголемите зелени површини во градот. На неделната акција присутни ќе бидат директорот на Волонтерски центар Скопје, Никола Станкоски и градоначалникот на Општина Кисела Вода, Орце Ѓорѓиевски....

Во текот на претходното деноноќие беа регистрирани нови 355 случаи на коронавирусот од направени 3.042 тестирања или 11,6 отсто, што е во рамките на просекот за време на викенд-деновите. Беа пријавени вкупно 15 починати лица, девет во претходните 24 часа и шест преку системот „Мој Термин“. Евидентирани беа 2.308 оздравени пациенти, од кои 329 во претходното деноноќие, додека останатите 1.980 оздравени се административно затворени случаи од периодот 16.09 – 31.10.2021, информира Министерството за здравство. Со тоа, бројот на активни случаи од околу 8.000 падна на 6.000. Досега во земјата се направени вкупно 1.481.925 тестирања на Ковид-19. Вкупната бројка на КОВИД-дијагностицирани лица во нашата земја од почетокот на епидемијата изнесува 217.025, бројот на оздравени пациенти е 203.325, на починати е 7.631, а бројот на активни случаи е 6.069. Најмногу активни има во Скопје и тоа 2821, следи Битола со 553, Прилеп – 336, Кавадарци – 247, Охрид – 222, Куманово – 210. Во другите градови има под 200 активни случаи. Министерството за здравство апелира граѓаните да се вакцинираат, бидејќи само така ќе дојдеме до колективен имунитет и ќе спречиме ширење на мутации на СарсКов2. Според статистиката за период од 6 август до 2 декември, од 60 772 заразени граѓани, 69 отсто од не биле вакцинирани. Смртноста кај невакцинираните е драстично поголема. Дури 79 отсто од починатите не биле вакцинирани, а 21 отсто примиле вакцина. Според анализите, починатите имале повеќе комбинирани хронични заболувања. Засега нема да се применува мерката задолжителна вакцинација или негативен ПЦР-тест во јавниот сектор, како што предложи Комисијата за заразни болести. Стимулацијата за вакцинација ќе се врши преку матичните лекари, кои ќе добијат финансиски бонус ако постигнат 70 отсто од вакцинацијата на своите прикрепени пациенти. Според светската статистика, досега се заразиле над 265 милиони луѓе, починале повеќе од 5,2 милиони жители и оздравеле околу 240 милиони лица. Вчера од Кембриџ, Масачусетс, пристигна веста дека новата варијанта на коронавирусот Омикрон најверојатно собрала најмалку една од нејзините многубројни мутации со тоа што презела парче од генетскиот материјал на друг вирус, најверојатно оној што предизвикува обична настинка, кој е присутен кај истите заразени клетки, велат истражувачите. Според светските агенции, ова не е забележано во ниту една претходните варијанти на коронавирусот, но е присутно кај многу други вируси, вклучително и оние кои предизвикуваат настинки, како и во човечкиот геном, велат експертите. – Омикрон со преземањето на новиот „код“, се прави себеси „почовечки“, што може да му помогне да го избегне имунолошкиот систем“, рече Венки Саундарарајан, експерт во Nference, компанија за анализа на податоци со седиште во Кембриџ, Масачусетс. Саундарарајан го предводеше ова истражување објавено како „препринт“, што значи дека сè уште чека научна рецензија. Откритието може да значи дека вирусот полесно се пренесува, но и дека предизвикува само блага или асимптоматска болест, што би било одлична вест за човештвото по речиси две години пандемија. Научниците сè уште не знаат дали Омикрон е позаразен од другите варијанти, дали предизвикува потешка форма на болеста или дали ќе ја надмине Делтата како најраспространета варијанта на коронавирусот. Илјадници луѓе вчера протестираа во Виена против ограничувањата наметнати во различни сектори од јавниот живот, чија цел е да се спречи ширењето на Ковид-19. Австриската Влада минатиот месец соочена со секојдневно зголемување на бројот на новозаразени, првата во Западна Европа повторно го воведе карантинот и најави задолжителни вакцини од февруари. Во Хрватска, пак, се собираат потписи за референдум против ковид сертификатите. Собирањето потписи го организира десничарската партија Мост....

Вицепремиерот и министер за економски развој и технологија на Република Словенија, Здравко Почивалшек денеска ќе престојува во официјална посета на Македонија. Почивалшек ќе има средба со министерот за економија Крешник Бектеши. Бектеши и Почивалшек, како што соопшти Министерството за економија, ќе разговараат за унапредување на економската и трговската соработка меѓу двете земји...

Цените на основните прехранбени производи нема да се менуваат до крајот на јануари. Лебот, шеќерот, брашното – тип 400, сончогледово масло за јадење, трајното млеко со масленост од 2,8, 3,2 и 3,5 проценти, свежото месо и сувомесни производи, сирењето и урдата до 31 јанури да се продаваат по цени што ги имале на 1 декември годинава. Замрзнувањето на цените ќе важи во трговијата на големо и во трговијата на мало. Одлуката за определување највисоки цени на основни прехранбени производи што вчера ја донесе Владата, може да биде продолжена и по 31 јануари 2021 ако тоа и натаму го бара состојбата на пазарот. Замрзнувањето на цените во петокот го најави министерот за економија Крешник Бектеши. Мерката е базирана на анализата и пресметките што ги направило Секторот за трговија при Министерството за економија. Бектеши најави дека ако предвидат оти ќе има ценовни шокови ќе се интервенира во рамки на надлежностите и согласно Законот за трговија. Со барање за замрзнување на цените на основните прехранбени производи претходно излезе Организацијата на потрошувачи на Македонија. Тоа, според ОПМ, е неопходна мерка за да се намали ударот на инфлацијата врз граѓаните, имајќи предвид дека со евентуалниот пораст на цената на струјата се очекува и нов бран на поскапувања кој ќе удри на потрошувачката кошница. Лидерот на ВМРО-ДПМНЕ Христијан Мицкоски, пак, смета дека замрзнувањето на цените на основните прехранбени продукти од страна на Владата, можеби ќе го ублажи, но никако не може да го стопира бранот на зголемена инфлација и намален стандард на граѓаните. Според него, причинител за инфлаторната спирала е енергетската криза, за чие надминување власта спроведува погрешни политики. -Тоа не се прави со ограничување на цената на производите, туку тоа е една од сетот мерки што требаше да се преземат, вели Мицкоски. Македонија не е прва земја во регионот што ги замрзна цените на основните прехранбени и стратешки производи. Во Србија од 1 декември „под мраз“ на 60 дена се ставени цените на шеќерот, брашното, сончогледовото масло, свинското месо и млекото. Претходно тоа го направи и Црна Гора, а Хрватска пред еден месец ги замрзна цените на горивата....

Предлог-буџетот за 2022 година по дополнувањата од Владата направени врз основа на амандманската расправа во собраниските комисии, се враќа пред пратениците во Собранието. Откако ќе биде вратен во Собранието, дополнетиот Предлог-буџет оди на пленарна седница, а таму расправата трае пет дена. Владата на вчерашната седница, од вкупниот број амандмани, прифати 23 во вкупен износ од околу 382 милиони денари. Со усвоените амандмани се зголемуваат средствата во Министерството за информатичко општество и администрација во износ од 250 милиони денари за реализација на програмските активности на Македонската радио телевизија. Еден милион денари повеќе добива Уставниот суд за избор на нови уставни судии, а зголемување од милион денари ќе има и кај Финансиската полиција. Со Предлог-буџетот за 2022 година, вкупните приходи се планирани на 238,9 милијарди денари и се за 7,4 проценти повисоки од годинава. Вкупните расходи се планирани во износ од 272,4 милијарди денари, што е за 1,4 отсто повеќе oд 2021 година. Дефицитот се планира на ниво од 33,5 милијарди денари или 4,3 отсто од БДП и е понизок за 2,2 процентни поени во однос на проценетиот дефицит во 2021 година. Во Предлог-буџетот за 2022 година за капитални инвестиции се предвидени 37,8 милијарди денари, за околу 27 проценти повеќе во однос на 2021 година. Министерот за финансии Фатмир Бесими во колумна посветена на Буџетот за 2022 година, истакнува дека клучни приоритети ќе бидат натамошно економско заздравување и забрзување на растот преку инвестиции, заштита на здравјето на граѓаните во се уште присутни ризици од пандемијата, но и поддршка на животниот стандард на населението. Овој буџет, наведува Бесими, е кроен според „златното правило“ во јавните финансии, односно буџетскиот дефицит е помал од капиталните расходи, што значи задолжување исклучиво за капитални расходи кои достигнуваат највисоко ниво од кој било претходен буџет. Тоа ќе поттикне инвестициски циклус што ќе придонесе за забрзан економски раст, додека преку зелената агенда, поддршката на иновациите и дигитализацијата до одржлив развој и подобар квалитет на живот за граѓаните. Буџетот содржи и програми за поддршка за време на криза, како и јасен тренд на фискална консолидација на среден рок, особено важно ако се има предвид фактот дека со новиот Закон за буџет кој е во собраниска процедура се предвидуваат воведување фискални правила и фискален совет, вели Бесими....

Наутро по одделни котлини ќе има услови за појава на магла. Преку денот ќе биде променливо облачно со слаб до умерен, а попладне долж Повардарието повремено засилен јужен ветер. Попладне во западните делови ќе има локални врнежи од дожд, кои во текот на ноќта ќе се прошират на повеќе места. Минималната температура ќе биде во интервал од -2 до 4, а максималната ќе достигне од 10 до 15 степени. Во Скопје, претпладне сончево со мала, а попладне со зголемена облачност. Во текот на ноќта ќе има повремени врнежи од дожд. Минималната температура ќе се спушти до 0, а максималната ќе достигне 13 степени. До вторник времето ќе биде променливо облачно со врнежи од дожд, а на планините од снег. Врнежите ќе започнат утре попладне, а ќе бидат пообилни во понеделник (на повеќе места над 20 л/м2). Поради заладување проследено со засилен северен ветер врнежите во вторник ќе преминуваат во снег и на некои пониски места. На планините и на повисоките места ќе се формира нова снежна покривка. Потоа во следните два дена ќе настапи стабилизирање на времето....

„Ние бараме избори веднаш значи што побрзо се случат толку подобро за државата, не само доколку одиме себично ние како партија тогаш би биле неискрени кон граѓаните. Затоа што себично е ако гледаме, нас ни одговара оваа состојба да продолжи да кажеме од партиска гледна точка виза ви Социјалдемократскиот сојуз. Меѓутоа она што се однесува за граѓаните и што го кажуваме, што побрзо заминат СДСМ и ДУИ и дојде нова структура компетентна, стручна која што ќе може да најде решение на проблемите ќе биде подобро за граѓаните. Според мене најдобро е да се оди, односно да се почитуваат Уставот и законите и во најбрз можен рок да се тие избори реализираат. Сега сме веќе месец декември, така да пролет од прилика е убав термин за нови предвремени парламентарни избори“, истакна Драган Ковачки, пратеник и член на ИК на ВМРО-ДПМНЕ во централниот дневник на Сител телевизија. Ковачки додаде дека почетокот на преговорите за датум за влез во ЕУ тоа го посакува ВМРО-ДПМНЕ и лобира за тоа да се случи што побрза затоа што тоа граѓаните го заслужуваат иако тоа не го заслужува Владата на СДСМ и ДУИ. Македонија предолго е во чекалницата на ЕУ. И време е да се отпочнат преговори. „Ние уште од сега бараме предвремени парламентарни избори затоа што локалните избори го дадоа односно го дефинираа идниот состав практично на Парламентот како треба изгледа. Односно моменталната состојба во Парламентот каква што е сега не ја рефлектира волјата на граѓаните и затао ги бараме овие предвремени парламентарни избори“, истакна Ковачки. Ковачки во врска со трагедијата во Струма посочи дека институциите се водени од луѓе, а тие луѓе треба да носат одговорност. Не би требало граѓаните да страдаат заради тоа што одредени личности кои што ги водат институциите не си ја вршеле својата должност. И не само тие што не ја вршеле својата должност туку и оние контролни механизми што ги има државата врз тие институции не се спроведени. И затоа според него треба сите тие одговорни лица да носат одговорност како морално, политичка одговорност така да носат и кривична одговорност, само така и на тој начин ќе се докаже дека Македонија е сериозна и зрела држава. „Меѓутоа факт е дека во моментов ова што го споменувате со автобусот е според мене и тоа како има доза на корупција, и кој што не е единствен случај, значи ова е случај кој што ни се провлекува подолго време. Значи не ни е прва оваа несреќа. Имате несреќа со болницата во Тетово, каде што Вилма Русковска кажуваше дека нема никој одговорен за таа работа, пазете јавна обвинителка е за организиран криминал. Понатаму гледате што се случува со сообраќајната несреќа во Ласкарци, се заборави случајот, истото мислам дека ќе се случи и со овој случај. Не сакам да ги споменувам оние претходни случаеви со ФИТР што беа со корупцијата, еве денеска и завчера излегуваат нови случаи со тој Фонд, со енормни суми кои што наместо да се даваат во равзој на млади и инвентивни решенија, проекти и така натаму, се даваат на лица што се блиски до Социјалдемократскиот сојуз и ДУИ“, укажа Ковачки. Ковачки рече дека граѓаните не треба да бидат казнети поради лошите политики на СДСМ....

Алтернатива ќе биде дел од Владата и од парламентарното мнозинство, одлучи вечерва Цантралниот совет, највисокото тело на партијата. Како што изјави партискиот портпарол Орхан Муртезани, одлуката била донесена со мнозинство гласови во Централниот совет. Лидерот на партијата Африм Гаши на седницата во партиското седиште во Тетово ги информирал за текот на досегашните преговори и програмските точки кои се договорени, како и за преземените обврски. Причина за влегување на Алтернатива во Владата, како што наведе Муртеазни, се историскиот момент за отворање на преговорите за членство во ЕУ и затворање на спорот со Бугарија како цели на државата, но и на Албанците затоа што со тоа ќе се отвори патот за евтоинтеграција на целиот регион. – Дополнително се договоривме Владата да бара меѓународна истрага за случаите каде што има сомнежи за политичка импликација како што се Монструм, Алфа, Диво насеље, Алмир Алиу итн. Договоривме и точки кои се однесуваат на рамномерниот регионален развој, економски развој на Липковско, заштита на семејството како јадро на општеството што е наша основна програмска дефиниција, но и заштита на цената на струјата која е исклучително важна во ова време. Сметаме дека постигнувањето на овие договори е голема победа за нашата држава, за Албанците во Северна Македонија и пошироко, но и партиска победа на Алтернатива, истакна Муртезани. Со влегувањето во Владата, посочи партискиот портпарол, Алтернатива докажа дека е клучот за решавање на кризата, а не само декор со четворица пратениците, и таа ќе преземе и важни одговорности. – Ние ќе преземеме значајни обврски од областа на здравството, борбата против криминалот и корупцијата, енергетиката, организацијата на дијаспората, но и образованието, културата и подигнувањето на квалитетот на животот на граѓаните, поддршка на економскиот живот на сите граѓани на државата, кажа Муртезани. Сите детали за договореното околу влегувањето на Алтернатива во Владата, утре во 13 часот во Клубот на пратениците ќе информираат лидерот на партијата Африм Гаши и премиерот Зоран Заев, кои свечено ќе ја потпишат програмата за заедничко дејствување...

Прилепските јавни-комунални претпријатија со механизацијата денеска спроведоа голема акција за чистење на диви депонии на периферијата од градот. Се чистеше на потегот од клучката кај „Салида“, по регионалниот пат Прилеп-Битола, до бензинската пумпа на „Лук Оил“. Рубин Абрашоски, в.д директор на прилепски „Комуналец“ рече дека мора да се подигне свеста за одлагање на сметот и упати апел до граѓаните да ги користат услугите на претпријатието за депонирање на сметот. – Оваа акција е на иницијатива на градоначалникот Борче Јовчески во соработка со јавните-комунални претпријатија и со помош на градежната оператива на градот. Ги чистиме дивите депонии за да имаме почист град. Додека во светот сите го селектираат ѓубрето и се залагаат за помалку смет и ѓубре, ние сме тие кои треба да придонесеме за почиста околина како за нас, за нашите сограѓани и за нашите поколенија. Упатувам апел до граѓаните да ги користат услугите на „Комуналец“ за депонирање на каков било отпад, бидејќи со тоа ја зачувуваме нашата средина чиста, рече Абрашоски. Се воспоставува континуиран систем на акции за чистење на дивите депонии....